Ermənistan Xarici İşlər Nazirliyi sülh müqaviləsi üçün göndərilən təkliflərə Bakıdan hələ ki, cavab almayıb.
Musavat.com Ermənistan mediasına istinadən xəbər verir ki, bunu Ermənistanın xarici işlər naziri Ararat Mirzoyan Vilnüsdə litvalı həmkarı Qabrielius Landsberqislə birgə keçirdiyi brifinqdə deyib.
“İrəvan Azərbaycan tərəfinə konstruktiv təkliflər göndərib və bir ay ərzində saziş bağlamağa hazırdır, lakin təəssüflər olsun ki, hələ də Bakıdan cavab almayıb”, - deyə nazir bildirib.
Mirzoyan litvalı həmkarı ilə həm Cənubi Qafqazda, həm də onun hüdudlarından kənarda mühüm fayda verə biləcək kommunikasiyaların və “dünyanın kəsişməsi” layihəsinin açılması məsələlərini müzakirə etdiyini qeyd edib. Nazir litvalı həmkarı ilə beynəlxalq və regional təhlükəsizlik məsələlərini müzakirə etdiyini qeyd edərək, Ermənistan və Azərbaycanın 1991-ci il Almatı Bəyannaməsi əsasında delimitasiyaya başladığını bildirib.
Ermənistan da Litva Xarici İşlər Nazirliyi rəhbərinin apreldə əldə edilmiş delimitasiya qərarından sonra verdiyi bəyanatı yüksək qiymətləndirir. Ölkələrin ərazi bütövlüyünün qarşılıqlı təsdiqi ilə bu prosesin davam etdirilməsini təmin etmək çox vacibdir. Mirzoyanın sözlərinə görə, bu, sərhəd məsələlərində aydınlığa nail olmaq və gələcəkdə təxribatların qarşısını almaq üçün lazımdır.
Nigar HƏSƏNLİ,
Musavat.com
