İsrail lazer hava hücumundan müdafiə sistemini sınaqdan keçirib.
Bu barədə “Tayms of İsrail” İsrail Müdafiə Nazirliyinə istinadən məlumat yayıb.
Məlumata görə, İsrail inkişaf etdirdiyi lazer hava hücumundan müdafiə sistemini keçən ay sınaqdan keçirib. “Iron Beam” adlandırılmış müdafiə sistemi keçirilən ilk sınaqlar seriyasında pilotsuz təyyarələri, raketləri, minaatanları və tank əleyhinə raketləri uğurla vurub.
Nazirliyin tədqiqat və inkişaf qrupunun rəhbəri General Yaniv Rotem sınaqların çətin diapazonlarda və poliqonlarda aparıldığını bildirib:
“Iron Beam”in idarə edilməsi sadədir və asandır, o həm də digər müdafiə sistemlərindən ucuz başa gəlir”.
Nazirliyin yaydığı videodan məlum olur ki, lazer əsaslı sistem bu ilin mart ayında İsrailin cənubundakı Negev səhrasında raket, minaatan və PUA-ları məhv edib.
Xatırladaq ki, İsrail Müdafiə Nazirliyi bir neçə ildir ki, lazer əsaslı müdafiə sistemini sınaqdan keçirir. Keçən il onunla pilotsuz təyyarəni vurub. Son sınaqlar idarə olunmayan mərmilər və tank əleyhinə idarə olunan raketlər də daxil olmaqla, digər təhlükələrə qarşı ilk uğurlu sınaq olub.//KONKRET.az
