İsrailin xarici işlər naziri Gideon Saar "X" platformasında etdiyi paylaşımda HƏMAS-ın Qəzza zolağında tətbiq etməyə çalışdığı yeni siyasi-hərbi strategiyanı sərt şəkildə tənqid edib.
Musavat.com xəbər verir ki, nazirin sözlərinə görə, HƏMAS-ın texnokratik hökumətə "yer vermək" niyyətini bildirməsi sadəcə bir hiylədir və əsl məqsəd tərksilah olunmaqdan qaçmaqdır. Saar vurğulayıb ki, qruplaşma Qəzzada məhz Livanın "Hizbullah modeli"ni təkrarlamaq istəyir. Bu modelə əsasən, texnokratik administrasiya məişət tullantılarının yığılması və digər kommunal xidmətlər kimi mülki məsələlərlə məşğul olacaq, HƏMAS isə bölgədə dominant hərbi qüvvə olaraq qalacaq.
Nazir qeyd edib ki, HƏMAS-ın əlində silah olduğu müddətcə, hər hansı mülki hökumət qaçılmaz olaraq məhz bu qruplaşmanın göstərişləri ilə fəaliyyət göstərəcək. Bu da öz növbəsində HƏMAS-a həm Qəzza xalqını əzməyə davam etməyə, həm də İsrailə qarşı cihad müharibəsini aparmağa imkan verəcək.
Gideon Saar İsrailin mövqeyinin qəti olduğunu bildirib: "İsrail "Tramp planı"nın tam şəkildə həyata keçirilməsində israrlıdır. Bu planın əsas prinsipləri HƏMAS və digər terror təşkilatlarının tərksilah edilməsi, eləcə də Qəzza zolağının tamamilə demilitarizasiyasıdır".
Musavat.com
