Azərbaycanın bölgədə antiterror tədbirlərinə gedən yolları hazırlayan Ermənistandır.
Bu barədə Trend-ə açıqlamasında türkiyəli general-mayor Özgür Tör deyib.
O qeyd edib ki, İkinci Qarabağ Müharibəsindən sonra Ermənistan sülh üçün heç bir addım atmadı.
"Ancaq silah almağa, əraziləri minalamağa davam etdi. Revanşist duyğulara qapılaraq sülhə gedən prosesləri uzatdı. Amma səhv etdi. Ermənistan Cənubi Qafqaz regionunda olduğunu unutdu. Onun dəstək alacaq bir yeri yoxdur", - deyə Ö.Tör əlavə edib.
Qeyd edək ki, Azərbaycan Respublikasının konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanılıb.
Üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanılıb.
Tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarılır. Mülki əhali və infrastruktur obyektləri hədəfə alınmır, yalnız legitim hərbi hədəflər sıradan çıxarılır.
