Türkiyə Prezidenti Rəcəb Tayib Ərdoğan bildirib ki, Türkmənistan qazının Türkiyə vasitəsilə xarici bazarlara çatdırılması indiki geosiyasi şəraitdə strateji əhəmiyyət kəsb edib.
Ərdoğan, Türkmənistan prezidenti Serdar Berdiməhəmmədovla danışıqlardan sonra Ankarada keçirdiyi mətbuat konfransında türkmən qazının dünya bazarına çıxarılmasının strateji əhəmiyyət daşıdığını qeyd edib: "İndiki şəraitdə təbii qazın Türkmənistandan Türkiyəyə və onun vasitəsilə dünya bazarlarına çatdırılması ayrıca strateji əhəmiyyət kəsb edib. Bu baxımdan bizim əməkdaşlığımız həm Türkmənistanla ikitərəfli formatda, həm də Azərbaycanın bu mexanizmə qoşulması yolu ilə üçtərəfli formatda vacibdir”.
Türkiyə Prezidenti bildirib ki, “tərəflər belə işləyən mexanizm əsasında əməkdaşlığın inkişafı sayəsində enerji təhlükəsizliyinə töhfə verməyi hədəfləyirlər”: “Bununla əlaqədar biz Xəzər dənizindən keçən Şərq-Qərb nəqliyyat dəhlizi layihəsinin inkişafı ilə bağlı baxışımızı müzakirə etdik. Bildiyiniz kimi, Türkmənistan enerji ehtiyatlarına görə regional və dünya liderləri sırasında yer alır".
O qeyd edib ki, Türkiyə ilə Türkmənistan arasında xüsusilə enerji, nəqliyyat, informasiya texnologiyaları, iqlim, kənd təsərrüfatı sahələrində əməkdaşlıq haqqında 13 protokol və memorandum imzalanıb. Türkiyə inşaat şirkətlərinin Türkmənistanda gördüyü işlərdən danışan Ərdoğan bildirib ki, bu günə kimi onlar ümumi dəyəri 50 milyard dollardan çox olan layihələr həyata keçiriblər. Səfər zamanı imzalanan memorandumlar, Türkiyə prezidentinin qeyd etdiyinə görə, ən yüksək səviyyəli şuralar çərçivəsində gələcək ikitərəfli əməkdaşlıq sayəsində praktiki həyata keçiriləcək.
Musavat.com
