Bəzi insanlar niyə COVID-19-a yoluxmur?
Epidemiya başlayandan bəri dünya bu suala cavab axtarır. ABŞ-dan gələn xəbərlər bu sualı yenidən elm dünyasının gündəminə gətirib.
Musavat.com "Daily Mail"ə istinadən xəbər verir ki, ABŞ alimləri Corciya ştatında yaşayan 56 yaşlı Con Hollisin bədənində koronavirusun bütün məlum variantlarına qarşı immun olduğunu aşkar ediblər.
Hollis üzərində araşdırma aparan qrup müşahidə edib ki, onun qanı 10 min dəfə seyrəldildikdə belə, koronavirusu 90 faiz məğlub edir. Bu vəziyyət mütəxəssislər tərəfindən "super qan" adlandırılıb.
Məlumata görə, COVID-19-a qarşı dünyanın ən güclü adamı kimi tanan Hollis virusun daha güclü variantlarına qarşı da immunitetə malikdir və elm adamları onun “fövqəl gücünün” SARS-a belə qalib gələcəyini düşünürlər.
Con Hollis
Alimlər bildirirlər ki, hər 100 nəfərdən birində virusa qarşı tam immunitet yarana bilər. Bəs koronavirusa yoluxmayan şanslı insanların sirri nədir?
İngiltərənin aparıcı təhsil ocaqlarından biri olan Oksford Universitetində aparılan araşdırmalar bu suala cavab tapmış ola bilər.
Nəticələri ötən həftələrdə ictimaiyyətə açıqlanan araşdırmaya görə, alimlər müəyyən qədər mutasiyaya malik insanlarda peyvənd olunduqdan sonra daha çox antikor reaksiyası yarandığı qənaətinə gəliblər.
Araşdırmaya görə, hər 10 adamdan 3-də HLA-DQB1*06 kimi tanınan gen var və sözügedən gen COVID-19 peyvəndlərindən sonra insanlarda daha çox antikor əmələ gəlməsinə səbəb olur.
Başqa sözlə desək, bu geni daşıyan insanlar peyvənddən sonra daha intensiv müdafiəyə malik olduqları üçün virusa yoluxmurlar.
Tədqiqat çərçivəsində elm adamları Pfizer-BioNTech və ya Oxford-AstraZeneca peyvəndinin ilk dozasını alan 1600 yetkin insanın qan nümunələrini araşdırıb. Komanda sözügedən genə sahib olanların qanında daha çox antikor olduğu qənaətinə gəlib.
Araşdırmanın nəticələri Nature Medicine jurnalında dərc olunub.
Nigar Cəfərli,
Musavat.com
