Alimlər deyirlər ki, Yer kürəsi 2024-cü ilin iyun ayına qədər davam edən “El Nino” fenomeni ilə rekord istilik yaşayacaq. Bu, Sakit okeanın səth sularının istiləşməsinə səbəb olan və nəticədə bütün planetin iqliminə əhəmiyyətli dərəcədə təsir edən təbii hadisədir.
Musavat.com xəbər verir ki, bu barədə “Science of the People” jurnalı yazır.
Klimatoloqlar 2023-2024-cü illərdə “El Nino”nun 1951-1980-ci illərin orta göstəricisi ilə müqayisədə bu il yerüstü hava temperaturunda regional dəyişikliklərə təsirini modelləşdiriblər.
Məlum olub ki, mülayim ssenari üzrə Benqal körfəzi və Filippində rekord istilik gözlənilir.
Bundan əlavə, intensiv “El Nino” ilə Karib dənizi və Cənubi Çin dənizlərində, həmçinin Amazon və Alyaskada rekord orta səth hava temperaturu gözlənilir. Nəticədə, bu ərazilərdəki dövlətlərin həddindən artıq istilərin təsirləri ilə mübarizə qabiliyyəti təhlükə altına düşəcək.
Sinoptiklərin fikrincə, 2024-cü ilin yayı bütün rekordları qıra və meteoroloji müşahidələr tarixində ən isti yay ola bilər. Bütün dünyada hava anomaliyaları müşahidə olunacaq.
Musavat.com
