“Keçən ilin 4 oktyabrında Rusiya XİN rəsmisi Mariya Zaxarova bildirmişdi ki, Rusiya sülhməramlılarının Qarabağda qalma müddəti Azərbaycanla birgə razılaşdırılaraq müəyyən ediləcək. Həmin müddətdən az vaxt keçməsinə baxmayaraq, regionda və Qarabağda əməliyyat şəraiti tam şəkildə dəyişib. Artıq Azərbaycan DİN -in və digər qurumların yerli nümayəndələri qarşıya qoyulan vəzifələri yüksək səviyyədə yerinə yetirir”.
Bu fikirləri deputat, Milli Məclisin Müdafiə, təhlükəsizlik və korrupsiyaya qarşı mübarizə komitəsinin üzvü Arzu Nağıyev Musavat.com-a Rusiya sülhməramlılarının Azərbaycanı tərk etməsi ilə bağlı açıqlamasında bildirdi.
Millət vəkili qeyd etdi ki, Qarabağda, yəni Xankəndi və ətraf rayonlarda lokal antiterror əməliyyatları bitdikdən sonra sülh bərqərar oldu və sülhməramlıların da funksiyası dəyişdi: “Rusiya tərəfi də başa düşür ki, mandatın 2025-ci ilə qədər olmasına baxmayaraq, həm Ermənistan və Azərbaycan arasında sülh müqaviləsi imzalandıqdan, eyni zamanda Qarabağ ərazisində sülh bərqərar olduqdan sonra kontingentin orada qalmasına heç ehtiyac da yoxdur…Məlumdur ki, Ermənistanın İran və Türkiyə sərhədini Rusiya Federal Təhlükəsizlik Xidmətinin sərhəd xidməti mühafizə edir. Zəngəzur dəhlizi məsələsi də gündəmdədir. Paşinyan belə bir bəyanat verdi ki, yolu Ermənistana məxsus qurum mühafizə edəcək və belə bir qurum da artıq yaranıb.
Deməli, bu gün sülhməramlıların Qarabağda qalmasına lüzum yoxdur. Bununla yanaşı, sülhməramlıların Qarabağı tərk etməsi bir daha sübut edir ki, birincisi, indi Qarabağ məsələsi tamamilə qapanıb, ikincisi, Rusiya sülhməramlıları ilk dəfə postsovet dövlətinin ərazisini könüllü olaraq tərk edirlər”.
A.Nağıyev ardınca bunları bildirdi: “Təbii ki, bir sıra suallar yarana bilər ki, hərbçilərin hamısı gedəcəkmi və ya bəziləri qalacaq, məsələn, minalardan təmizləmə məsələlərində Azərbaycan tərəfi ilə qarşılıqlı əlaqədə olmaq…Artıq Ağdamda fəaliyyət göstərən Rusiya-Türkiyə birgə monitorinq mərkəzi də fəaliyyətini dayandırır və bu barədə Türkiyə Milli Müdafiə Nazirliyinin mətbuat katibi Zeki Aktürk məlumat verib. Yəni suveren Azərbaycan ərazisində nəyisə monitorinq etmək artıq heç bir məntiqə sığmaz. Monitorinq Mərkəzi 2021-ci il yanvarın 30-da Türkiyə ilə Rusiya arasında imzalanmış memorandum çərçivəsində açılıb və hazırda onun fəaliyyətinə heç bir ehtiyac qalmayıb”.
Deputat qeyd etdi ki, Azərbaycan tərəfi heç vaxt “Rusiya təcili regionu tərk etməlidir”, kimi bəyanatlar vermədi: “Sadəcə vurğulanırdı ki, sülhməramlılar 2025-ci ilin noyabrına qədər Azərbaycan ərazisində qala bilərlər. Rusiya hərbçilərinin vaxtından əvvəl getməsi onu deməyə əsas verir ki, Moskva və Bakı ən yüksək səviyyədə siyasi razılığa gəliblər və bu, artıq təsdiqini də tapdı.
Bir məsələni də qeyd etmək yerinə düşərdi, Rusiya sülhməramlı kontingentinə kiçik və iriçaplı atıcı silahlarla 1960 hərbi qulluqçu, 90 zirehli transportyor və 380 ədəd avtomobil və xüsusi texnika daxildir və bunların hamısı çıxarılır. Ən mühüm məsələ də ondan ibarətdir ki, indi Azərbaycan da xarici hərbi kontingentin öz ərazisində mövcudluğundan tam azad olur”.
A.Nağıyev bildirdi ki, Qərbin Qarabağa BMT missiyası adı ilə girmə şansı da yoxdur: “Çünki sülhməramlıların əsas vəzifəsi barışıq yaratmaq və sülhü bərqərar etməkdir. Bu gün Qarabağ ərazisində konflikt yaradan tərəflər də yoxdur və buna görə də hər hansı sülh missiyasına da ehtiyac yoxdur. İkinci bir məsələ də budur ki, Rusiya Qarabağı tərk edibsə bu o demək deyil ki, Qərbin bura yerləşməsinə imkan veriləcək. Azərbaycanın müstəqil daxili və xarici siyasəti var və bunu dəyişmək də mümkün deyil...”
E.Paşasoy,
Musavat.com
