Azərbaycan Respublikası Mədəniyyət Nazirliyinin dəstəyi ilə Azərbaycan Dövlət Nəfəs Alətləri Orkestri Rusiyanın Yekaterinburq şəhərində IX Beynəlxalq Nəfəs Alətləri Orkestrləri Festivalında ölkəmizi təmsil edib.
Bu barədə Musavat.com-a Mədəniyyət Nazirliyindən məlumat verilib.
Bildirilir ki, festivala bədii rəhbər-direktor, dirijor, Əməkdar incəsənət xadimi Əlibala Rzayevin başçılığı ilə 36 nəfərlik heyət qatılıb. Eyni zamanda Əməkdar artist Aqil Cəfərovun rəhbərliyi ilə Rusiyanın Krasnoyarsk vilayətində fəaliyyət göstərən “Odlar yurdu” Azərbaycan Xalq Mahnı və Rəqs Ansamblı və beynəlxalq və respublika müsabiqələri laureatı, Prezident mükafatçısı, Azərbaycan Dövlət Nəfəs Alətləri Orkestrinin solisti Mahir Tağızadə də festivalda orkestrlə birgə çıxış ediblər.
Festivalda Azərbaycan bəstəkarlarının əsərləri ifa olunub və böyük maraqla qarşılanıb. Konsertin sonunda orkestr festivalın təşkilat komitəsinin diplomu ilə təltif olunub.
Azərbaycan Dövlət Nəfəs Alətləri Orkestri nümunəvi çıxışları ilə festival boyu mədəniyyətimizin yüksək səviyyədə təqdimatına nail olub.
