Müsavat Partiyasının başqanı Arif Hacılı 31 Mart Azərbaycanlıların Soyqırım Günü ilə bağlı Azərbaycan xalqına müraciət edib.
Müraciətdə deyilir:
“Hörmətli soydaşlarım!
1918-ci ilin 31mart günü Şaumyanın başçılıq etdiyi bolşeviklərin və erməni daşnaklarının silahlı dəstələrinin Azərbaycan əhalisinə qarşı Bakı şəhərində törətdikləri dəhşətli qırğın dünya tarixinin ən böyük faciələrindən biridir. Həmin hadisələr vaxtı Bakıda 12 mindən çox azərbaycanlı ölrürülüb, on minlərlə insan itkin düşüb. Bütövlükdə həmin ilin mart-aprel aylarında Azərbaycanın müxtəlif bölgələrində 50 mindən şox dinc vətəndaş – qadınlar, uşaqlar, qocalar dəhşətli işgəncələrlə qətlə yetirilib. Bu dəhşətli soyqırım bir tərəfdən xalqımızın avanqard qüvvəsi olan Müsavat Partiyasının rəhbərliyi ilə Bakıda və Azərbaycanda genişlənən istiqlal hərəkatının qarşısını almaq, bütövlükdə Bakını və ətraf bölgələri yerli əhalidən təmizləmək məqsədi daşıyırdısa, digər tərəfdən erməni millətçilərinin insanlığa nifrətlə yoğrulmuş ideologiysından qaynaqlanırdı.
Tarix Azərbaycan xalqını dəfələrlə ağır sınaqlara çəkib.
Lakin xalqımız qətiyyəti və müdrikliyi ilə, tolerantlığı və sülhpərvərliyi ilə bu sınaqlardan həmişə mərdliklə çıxıb. 1918-ci il qətliamı da millətiin iradəsini qıra bilmədi, həmin hadisələrdən az sonra ölkəmiz öz müstəqilliyinə qovuşdu. Müstəqilliyimiz də çox sınaqlardan keçdi, amma bu gün o artıq əbədidir. Ancaq bizim müstəqillik uğrunda qurban gedən həmvətənlərimiz qarşısında borcumuz çoxdur. Mart qırğınının günahsız qurbanları da bu Vətənin şəhidləri və bizim and yerimizdir. Onların qarşısındakı müqəddəs borcumuzdan bu faktı təkcə Azərbaycan tarixinin yox, həm də dünya tarixinin faktına çevirməklə və bir də xalqımıza təmənnasız, vicdanlı xidmətlə, ərazi bütövlüyümüzü bərpa etməklə, ölkəmizi inkişaf etdirməklə, onu azad, cümhuriyyət ideallarına sadiqliklə firavan bir məmləkətə çevirməklə çıxa bilərik.
Tanrı şəhidlərimizin ruhunu şad eləsin”.
Musavat.com
