“Qərb əlindən gələni edir, lakin biz Qərbin imkanlarını və bizə kömək etmək istəyini çox ayıq şəkildə dəyərləndirməliyik”.
Musavat.com xəbər verir ki, bu barədə Ermənistan Milli Tərəqqi Partiyasının koordinatoru Levon Zurabyan öz feysbuk səhifəsində yazıb.
“Aprelin 5-də Paşinyan-Blinken-fon der Leyen görüşü uğursuzluq, yoxsa “tarixi dönüş”dür? Gəlin, rəqəmlərlə danışaq.
9 iyul 2021-ci ildə Avropa İttifaqı növbəti 5 il ərzində Ermənistana 2,6 milyard avro (3,1 milyard dollar) yardım göstərməyə hazır olduğunu bəyan edib.
Aprelin 5-də isə Paşinyan-Blinken-fon der Leyen görüşü zamanı məlum olub ki, bu qərardan üç il sonra Avropa İttifaqı və Amerika Birləşmiş Ştatları birlikdə Ermənistana müvafiq olaraq 270 milyon avro və 65 milyon ABŞ dolları verəcəklərini vəd edirlər. Yəni dörd il ərzində yardım təxminən 360 milyon ABŞ dolları təşkil edəcək. Nəticədə onlar nəinki əvvəllər verdikləri vədləri yerinə yetirə bilməyiblər, həm də vədlərin məbləğini 10 dəfədən çox azaldıblar.
Paşinyan komandasının və onun “qərbyönlü” tərəfdarlarının 1991-ci ildən Ermənistanın “yanlış oriyentasiya” qəbul etdiyini və buna görə də Qərbdən adekvat dəstək almadığını iddia etməsi bu fonda çox maraqlı görünür.
Fakt budur ki, 90-cı illərdə, Ter-Petrosyan administrasiyası dövründə Ermənistan Amerika Birləşmiş Ştatlarından və Dünya Bankının vasitəçiliyi ilə birbaşa hökumət yardımı alırdı. Həmin dövrdə Ermənistanın aldığı ümumi məbləğ 1,8 milyard dollar təşkil edib.
Belə çıxır ki, 1991-ci ildə “yanlış oriyentasiya”nı qəbul edən Ermənistan Qərbdən 4 il ərzində (1993-1997) Qərbin yalnız 8 ildə (2021-ci ildən) vəd etdiyindən 10 dəfə çox dəstək alıb. Yəni bu, bizim üçün uğursuzluqdur, yoxsa görünməmiş tarixi dönüş? Məncə, cavab aydındır”, - deyə Zurabyan qeyd edib.
Musavat.com
