Belarusun Milli Statistika Komitəsi 2023-cü ildə ölkə əhalisinin, demək olar ki, 45 min nəfər azaldığını açıqlayıb.
Musavat.com xarici mediaya istinadla xəbər verir ki, 2020-ci illə müqayisədə ölkədə əhalinin dörddə bir milyon nəfər az olduğu bildirilir.
Respublika Şurasının sədri Natalya Koçanova ənənəvi dəyərlərə müraciət etməklə demoqrafik böhrandan çıxacağına əmindir. Ekspertlər bunun səbəblərini həm siyasi, həm də tarixi hesab edirlər.
Milli Statistika Komitəsinin məlumatına görə, 2024-cü ilin əvvəlinə Belarusun əhalisi 9 milyon 155 min 978 nəfər olub. 2023-cü ilin əvvəlinə isə rəsmi məlumatlara görə, ölkədə 9 milyon 200 min 617 nəfər yaşayırdı.
Müvafiq olaraq, il ərzində ölkə sakinlərinin sayı 44 639 nəfər azalıb.
Qeyd olunur ki, bu, sabit tendensiyadır. Belarus üçün dönüş nöqtəsi olan 2020-ci ilin məlumatlarını (9 milyon 410 min 259) müqayisə etsək, əhalinin 254 281 nəfər azaldığını görərik.
Musavat.com
