“Qarabağ”ın baş məşqçisi Qurban Qurbanov “Krasnodar” klubunda çıxış edən Kadi Borgesin komandaya mümkün qayıdışına münasibət bildirib.
51 yaşlı mütəxəssis braziliyalı oyunçu ilə danışıqlarının olmadığını söyləyib.
Qurbanov onun Rusiya təmsilçisi ilə böyük müqaviləsinin olduğunu vurğulayıb: “Buradan gedən futbolçuların hamısına demişik ki, qapımız üzünüzə həmişə açıqdır. Deyim ki, inşallah qayıdar, düzgün olmaz. O da böyümək üçün qarşısına məqsəd qoyub. “Qarabağ”da hər şey onun üçün yaxşı idi. Belə variant olsa, yox demərik. Hər şeyi gələcək göstərəcək”.
Qeyd edək ki, Kadi Borges 2021-ci ilin yayından bu ilin əvvəlinə qədər “Qarabağ”ın formasını geyinib. O, qış fasiləsində 5 milyon avro müqabilində “Krasnodar”a transfer olunub.
