Qərb hesab edir ki, o, istənilən potensial hərbi rəqib qarşısında əhəmiyyətli texnoloji üstünlüyə malikdir. Bununla belə, Çinin donanması hazırda dünyanın ən böyüyüdür və onun nüvə arsenalı 2030-cu ilə qədər minlərlə döyüş başlığına çata bilər.
Musavat.com xəbər verir ki, bu fikirlər Bloomberg Agentliyinin təhlilində yer alıb.
Bloombergin məlumatına görə, Çin ordusu yüksək texnologiyalar sahəsində sürətlə irəliləyir: “Çin hipersəs raketləri sahəsində Qərbi geridə qoyub – onun raketləri səsdən beş dəfə yüksək sürətlə hərəkət etməyə və hava hücumundan müdafiə sistemlərindən yayınmağa qadirdir”.
Eyni zamanda Çin süni intellektin inkişafına böyük sərmayələr yatırır. Nəşr bildirir ki, Çinin mövqeyinin güclənməsi qlobal güc balansını dəyişə bilər. Bu baxımdan, Qərb təcili olaraq öz inkişafını sürətləndirməli və bu balansın hansı istiqamətdə dəyişəcəyini görmək istəmirsə, Çinin inkişafını ləngitməlidir.
Nəşr qeyd edib ki, Qərb hərbi-sənaye kompleksini dirçəltmək üçün ilk növbədə Qərb kapitalizminin malik olduğu ən yaxşı imkanlardan istifadə etməlidir. Agentliyin anailitkləri qeyd edirlər ki, Pentaqonun komanda-nəzarət sistemi fəaliyyət göstərir, çinlilər isə dövlət müəssisələrindən kənara çıxmağa, sahibkarları və həm dövlət, həm də özəl sektor tərəfindən maliyyələşdirilən “yeni tipli” laboratoriyaları cəlb etməyə çalışırlar. Ən istedadlı Qərb texnoloji insanlarının özəl sektora getdiyi bir vaxtda, Çin ordusu ən yaxşı texniki istedadlara malikdir: “Çində kosmosa səyahət və peyk rabitəsi sahəsində ən mühüm inkişafa özəl sektor nail olur”.
Bundan əlavə, nəşr diqqəti ona yönəldib ki, Qərb Çin kimi universitetləri də bu işə cəlb etməklə öz alimlərini “yetişdirməlidir”. Agentliyə görə, Qərb bəzi istisnalarla, elmi dairələrlə hərbçilər arasında əlaqələrin inkişafına laqeyd yanaşır: "Qərbin Soyuq Müharibədə uğuru Pentaqon ilə digər iki element: güclü korporasiyalar və aparıcı institutlar arasındakı münasibətdən asılı idi. Şirkətlər yüksək texnologiyalı silahların istehsalında Qərbin irəlidə olmasını təmin edirdilər. Universitetlər isə innovativ intellektual güc təmin edirdilər. İndi dünya yeni Soyuq Müharibəyə qədəm qoyduğu üçün bu münasibətlər daha sürətli innovasiyaların və daha çevik korporasiyaların yeni dünyası üçün yenidən qurulmalıdır”.
Qeyd edək ki, Pentaqonun illik hesabatına görə, bu ilin may ayında Çinin arsenalında 500-dən çox operativ nüvə başlığı olub. Yeni hesabatda həmçinin qeyd olunur ki, Çin donanması keçən ilki 340 gəmiyə qarşı bu il 370-dən çox gəmi və sualtı qayıq idarə edir.
Buna cavab olaraq Çin Xarici İşlər Nazirliyi bildirib ki, Pentaqonun Çinin 2030-cu ilə qədər 1000-dən çox nüvə başlığına sahib olacağı bildirilən hesabatı qərəzlə doludur və faktları təhrif edir. Xarici İşlər Nazirliyi qeyd edib ki, Çin nüvə silahı yarışında iştirak etmək niyyətində deyil.
Musavat.com
