Krım yarımadasını vuran qasırğa dağıntıların miqyasına görə görünməmiş kimi tanınıb.
Musavat.com Rusiya mediasına istinadla xəbər verir ki, bu barədə bazar ertəsi, noyabrın 27-də respublika başçısının müşaviri Oleq Kryuçkov məlumat verib.
Onun sözlərinə görə, indiyədək belə miqyasda dağıntı olmayıb.
“Hazırda biz dəymiş ziyanı qiymətləndiririk, lakin çox böyükdür. Krımda heç vaxt belə hal olmayıb. 2007-ci ildə Kerçdə yerli olaraq oxşar hadisə baş vermişdi, lakin bu gecə baş verənlər bütün Krım üçün böyük faciədir”, - Oleq Kryuçkov bildirib.
Xatırladaq ki, fırtına Krımı noyabrın 26-da axşam saatlarında vurub. Pis havanın əsas zirvəsi saat 21.00-dan gecə yarısına qədər baş verib. Küləyin sürəti saatda 144 kilometr və ya saniyədə 40 metrə çatıb.
Fırtına nəticəsində ölənlər var. Yevpatoriyada 7 nəfər müxtəlif dərəcəli bədən xəsarətləri alıb, onlardan ikisi tibb müəssisəsinə yerləşdirilib. Sevastopoldakı akvarium muzeyinin 500-dən çox canlısının öldüyü də bildirilir.
Musavat.com
