ABU 1999-cu ildə 6 il müddətinə, 2005-ci ildə isə 5 il müddətinə yenidən lisenziya alıb: “ABU-nun fəaliyyətinə verilmiş lisenziyanın müddəti bu il iyulun 8-də bitdiyi üçün bu məsələyə yenidən baxılması, eləcə də bu ali məktəbdə tədris prosesinin təşkili vəziyyətinin araşdırılması məqsədilə ekspert qrupu yaradılıb. Ekspert qrupu ali məktəbin maddi-texniki bazası ilə tanış olmaqla universitet rəhbərliyinin və Təhsil Nazirliyinin müvafiq şöbələrinin təqdim etdiyi sənədləri təhlil etməklə araşdırma aparıb. Araşdırma zamanı məlum olub ki, 2005-ci illə müqayisədə ABU-nun maddi-texniki bazasının yaxşılaşdırılması sahəsində müəyyən işlər görülsə də tədrisin təşkilində normativ sənədlərin tələblərinə riayət olunmayıb, hətta daha ciddi pozuntulara yol verilib. Ekspert qrupunun hazırladığı arayış Təhsil Nazirliyi Lisenziya Komissiyasının iclasında müzakirə olunub. İclasda universitetin ali kollegial idarəetmə orqanı olan Elmi Şurasının imkanlarından istifadə edilmədiyi, ali məktəbin strukturuna daxil olan fakültələrin bir çoxunun mövcud qaydaların tələblərinə zidd fəaliyyət göstərdiyi, əksər kafedralar, xüsusən texniki ixtisaslar üzrə mütəxəssis hazırlayan kafedralarda zəruri avadanlıqla təchiz edilmiş tədris laboratoriyalarının olmadığı, kafedraların işinin düzgün təşkil edilmədiyi, müəllimlərin dərs bölgüsündə müvafiq qaydaların kütləvi şəkildə pozulduğu, universitetdə yüksək ixtisas dərəcəsinə malik olmayan və alimlik dərəcəsi (elmi adı) olmayan müəllimlərə mühazirə dərslərinin verildiyi, mütəxəssis hazırlığı həyata keçirilən ixtisasların tədris planlarının tərtibində qüvvədə olan normativ sənədlərin tələblərinə tam riayət olunmadığı, tədris planlarında bir sıra fənlərin tədrisinə ayrılan saatların normativlərdən az olduğu və ya ümumiyyətlə tədris olunmadığı, nizam-intizam qaydalarına riayət edilmədiyi və tələbələrin dərslərə davamiyyətində ciddi nöqsanların olduğu, qrupların tədris jurnallarının formal olaraq doldurulduğu, bəzən dəyişdirildiyi və müəllimlərin imzalarının saxtalaşdırıldığı, tələbələrin biliyinin formal qiymətləndirildiyi, fənlərin tədrisinin pərakəndə şəkildə (müəllimin istədiyi kimi) aparıldığı, universitetdə tələbə kontingentinin formalaşması, tələbələrin kursdan-kursa keçirilməsi, qrup və birləşmələrin təşkilində ciddi pozuntulara yol verildiyi, universitetin daxilində bir ixtisasdan digərinə və ya digər ali məktəblərdən tələbələrin köçürülməsi, tələbələr sırasına bərpası və xaric olunması zamanı mövcud qanunvericiliyin tələblərinin ciddi şəkildə pozulduğu, hətta saxtakarlığa yol verildiyi, köçürülmə sənədlərinin saxtalaşdırıldığı, diplom vermə zamanı sənədləşmə və sənədlərin icrası mexanizminin kobud şəkildə pozulduğu, universitetin Moskva filialının fəaliyyətinin mövcud normativ sənədlərə uyğun təşkil olunmadığı qeyd edilib.
Lisenziya Komissiyasının yekdil qərarı ilə qeyd olunan nöqsanlar nəzərə alınaraq Təhsil Nazirliyi tərəfindən ABU-nun fəaliyyətinə verilmiş 30.06.2005-ci il tarixli 003283 â„–-li xüsusi razılığın (lisenziya) müddətinin uzadılmaması barədə qərar qəbul olunub. Eləcə də universitet rəhbərliyinə 01.09.2010-cu il tarixə qədər ali məktəbdə təhsil alan, təhsili başa çatan, hazırda müxtəlif səbəblərdən təhsilində fasilə yaranan şəxslər barədə məlumatı 10 gün müddətində hazırlayıb Təhsil Nazirliyinə təqdim etmək tapşırılıb.
Həmçinin nazirliyin müvafiq şöbə və strukturlarına qanunun tələbləri gözlənilməklə bu ali məktəbə qəbul olunub hazırda təhsil alan və ya təhsili müəyyən səbəblərdən yarımçıq qalmış tələbələrin gələcək təhsilləri ilə bağlı təkliflər hazırlamaq barədə tapşırıq verilib".
Xatırladaq ki, ABU yaradılan vaxtdan mərhum akademik Aqil Əliyevin himayəsi altında olub. A.Əliyev 2006-cı ilin martında dünyasını dəyişdikdən sonra universitet və ABU-nun rektoru Elşad Abdullayev demək olar ki, sahibsiz qaldı. Təhsil naziri M.Mərdanov bir neçə dəfə ABU-nu bağlamağa cəhd göstərib. Həmçinin rektor E.Abdullayevi işində yol verdiyi qüsurlara görə ciddi şəkildə tənqid edib. Nəhayət, nazir-rektor mübarizəsi birincinin qələbəsi ilə yekunlaşdı.
Qeyd edək ki, M.Mərdanov ABU və E.Abdullayev barədə dediyi tənqidlərin əksəriyyətində haqlı idi. ABU gerçəkdən də bazara çevrilmişdi və orada təhsil alan tələbələr ciddi problemlərlə üzləşirdi. İndi maraqlıdır, görəsən, E.Abdullayevin bundan sonrakı taleyi necə olacaq? Təhsil Nazirliyinin yaydığı və bizim də çap etdiyimiz bu açıqlamada ABU və onun rəhbərliyi ciddi məsələlərdə ittiham olunur. Nazirliyin yaydığı məlumatda göstərilənlər hüquq-mühafizə orqanları tərəfindən araşdırılsa, E.Abdullayev həbs oluna bilər. Amma ikinci variant da var: onu tam müflisləşdirib, mal-mülkünü və universitetini bina qarışıq əlindən alıb sərbəst də buraxa bilərlər.
Sonda bir məqamı da xatırlatmağı lazım bildik. Təxminən iki həftə öncə “Yeni Müsavat”da ABU-nun 6 müəlliminin qanunsuz tələbə qəbuluna görə Baş Prokurorluq (bəzi məlumatlarda MTN) tərəfindən həbs olunduqları barədə xəbər dərc olunmuşdu. Sonradan bu məlumatı heç cür dəqiqləşdirə bilmədik. Amma son olaylar göstərir ki, bu məlumat da boşuna deyilmiş. Sabahkı sayımızda bu mövzudan ətraflı şəkildə bəhs edəcəyik.
XƏBƏR LENTİ
