2026-cı il iyunun 7-də Ermənistanda keçirilən parlament seçkilərinin nəticələri ölkədə genişmiqyaslı siyasi və hüquqi qarşıdurma yaradıb.
Musavat.com erməni mediasına istinadən xəbər verir ki, seçkilərdə iştirak edən 18 siyasi qüvvədən 7-si rəsmi nəticələri tanımayaraq, onların ləğvi tələbi ilə Konstitusiya Məhkəməsinə müraciət edib.
İyunun 19-da təqdim olunan iddialar seçkiöncəsi kampaniya və səsvermə günü hakimiyyət tərəfindən yol verilmiş total və sistemli pozuntulara cavab kimi qiymətləndirilir. Bu isə gələcək parlamentin və hökumətin legitimliyini ciddi şəkildə sual altına qoyur.
Konstitusiya Məhkəməsinə müraciət edənlər arasında əsas müxalif qüvvələr — “Ermənistan” və “Güclü Ermənistan” blokları, həmçinin “Çiçəklənən Ermənistan” , “Yeni güc”, “Birlik qanadları”, “Demokratiya, qanun, intizam” və “Respublika naminə demokratiyanın müdafiəçiləri alyansı” partiyaları yer alır.
Bütün iddiaçıların əsas tələbi Mərkəzi Seçki Komissiyasının qərarının etibarsız sayılması və yeni seçkilərin təyin edilməsidir. “Güclü Ermənistan” bloku və “Çiçəklənən Ermənistan” partiyası kimi bəzi siyasi qüvvələr alternativ variantları da istisna etmir — məsələn, ikinci turun keçirilməsi və ya mandatların vətəndaşların real iradəsinə uyğun şəkildə yenidən bölüşdürülməsi.
Müxalifət Konstitusiya Məhkəməsinə təqdim etdiyi geniş sübut paketləri ilə seçki prosesinə görünməmiş təzyiqlərin edildiyini iddia edir. Müxtəlif partiyaların nümayəndələrinin səsləndirdiyi əsas pozuntular arasında seçicilərə təzyiq, inzibati resurslardan istifadə və səsvermə prosedurlarının pozulması xüsusi yer tutur.
Konstitusiya Məhkəməsinə müraciət edən müxalif qüvvələr eyni zamanda məhkəmənin qərəzsizliyinə dair ciddi narahatlıq ifadə edirlər. “Ermənistan” və “Güclü Ermənistan” bloklarının nümayəndələri hakim partiya ilə əlaqəsi olan hakimlərin işdən kənarlaşdırılmasını tələb edəcəklərini açıq şəkildə bəyan ediblər. Hüquqşünas Ovannes Xudoyan bildirib ki, hakim Vladimir Vardanyan bu işi obyektiv şəkildə araşdıra bilməz. “Yeni güc” partiyasının nümayəndəsi Akop Karapetyan isə qeyd edib ki, Konstitusiya Məhkəməsinin ən azı iki hakimi Paşinyan dövründə təyin olunub, onlardan biri isə onun siyasi tərəfdaşıdır. Bununla belə, o, “Konstitusiya Məhkəməsi kollegial orqandır və biz qanunun ruhuna və hərfinə uyğun ədalətli qərar gözləyirik” deyə ümidini ifadə edib.
Qanunvericiliyə əsasən, Konstitusiya Məhkəməsi daxil olmuş müraciətlər üzrə qeydiyyatdan keçdikdən sonra 15 gün ərzində qərar qəbul etməlidir. İşə baxılması şifahi prosedur qaydasında həyata keçiriləcək.
Musavat.com
