Cari kənd təsərrüfatı ilinin 11 ayı ərzində (2023-cü il iyulun 1-dən 2024-cü il mayın 31-dək) Rusiya rekord həcmdə - 62,8 milyon ton taxıl ixrac edib.
Musavat.com Rusiya Taxıl İttifaqının açıqlamasına istinadən xəbər verir ki, bu, əvvəlki mövsümün eyni dövrü ilə müqayisədə 8 faiz çoxdur.
Təşkilat bildirir ki, nəticədə bütün 2023/2024-cü kənd təsərrüfatı ili üçün ixrac potensialı 67 milyon ton olmaqla, iyunda taxıl ixracının həcmi 4,2 milyon ton, o cümlədən buğda ixracı təxminən 3,9 milyon ton təşkil edə bilər. Buğdanın ümumi ixrac həcmi kənd təsərrüfatı ili üçün 55 milyon ton qiymətləndirilir.
Ümumi ixracın artmasına baxmayaraq, bu prosesdə mayın əvvəlindən başlayan azalma tendensiyası ay ərzində davam edib.
Mayın 27-dək ixraca 4,65 milyon ton taxıl göndərilib ki, bu da ötən ilin mayın 1-dən 27-nə olan göstəricidən 20,4 faiz azdır. O cümlədən buğda ixracı 18,8 faiz azalaraq 3 milyon 846 min tona, arpa 12,8 faiz azalaraq 440 min tona, qarğıdalı ixracı təxminən 40 faiz azalaraq 363 min tona düşüb. May ayının sonuna qədər təxminən 4 milyon ton buğda ixrac olunacaq ki, bu da ötən ilin may ayı ilə müqayisədə 900 min ton azdır.
Mayda Rusiya buğdasının əsas alıcıları Misir, Türkiyə, Yəmən, Keniya və Banqladeş, arpanın əsas alıcıları Səudiyyə Ərəbistanı və İran olub. Qarğıdalının əsas həcmi İrana, Türkiyəyə, Liviyaya göndərilib.
Son həftələrdə dünya bazarında taxıl qiymətləri sürətlə artır. Əsas taxılçılıq ölkələrində müşahidə olunan qeyri-sabit hava şərtlərinin məhsuldarlığa mənfi təsiri proqnozları alıcıların aktivləşməsinə səbəb olub. Ötən həftə ərzində Fransa buğdasının qiyməti 4 faiz artaraq bir ton üçün 269 dollar olub. Ayın əvvəlindən artım 25,7 faiz təşkil edib. Amerika buğdası ötən həftədə 4,3 faiz bahalaşaraq bir ton üçün 269 dollara çatıb, mayın əvvəlindən isə 19,6 faiz bahalaşıb. Mayın əvvəlindən Rusiya buğdasının qiyməti (4-cü dərəcəli, FOB Novorossiysk) 6,5 faiz artaraq bir ton üçün 245 dollara çatıb, ay ərzində isə 20 faiz bahalaşıb. Buna baxmayaraq, Rusiya buğdasına Avropa buğdasına nisbətən endirim qalır - 24 dollar təşkil edir.
Təşkilat bildirir ki, ixracatçıların buğdaya olan aktiv tələbi alış qiymətlərinin həftədə orta hesabla 9 faiz artmasına səbəb olub. Dollar ifadəsində istehsalçılardan alış qiyməti bir həftə əvvəlki 137,4 dollardan 155 dollara yüksəlib. Ayın əvvəlindən artım 30,7 faiz təşkil edib.
Musavat.com
