Xəbər verdiyimiz kimi, İsrail ilə Fələstin arasında əsir mübadiləsi razılaşması çərçivəsində 4 günlük humanitar atəşkəs bu gün yerli vaxtla saat 07:00-da başlayıb.
Musavat.com xəbər verir ki, İsrail və HƏMAS arasında dörd günlük atəşkəs HƏMAS-ın İsrailin azad edəcəyi 150 fələstinli məhbus müqabilində 50 girovu təslim etməsini şərtləndirir. Məhkum mübadiləsi Bakı vaxtı ilə saat 18:00-da baş tutacaq.
Bu gün Qəzzada nələr yaşanacaq?
- İsrail və Fələstin arasında əldə olunan razılaşma çərçivəsində ilk israilli məhbus qrupu - 13 qadın və uşaq yerli vaxtla saat 16:00-da (Bakı vaxtı 18:00) azad ediləcək.
- Qırmızı Xaç girovları Rəfah sərhəd qapısına qədər müşayiət edəcək. Şəxsiyyətin müəyyənləşdirilməsi prosesindən sonra girovlar İsrail ordusuna təhvil veriləcək.
- Girovlar fiziki və psixoloji yardım üçün Təl-Əvivdəki xəstəxanalara aparılacaq.
- Mübadilənin ilk günündə 39 fələstinli məhbus İsrail tərəfindən azad ediləcək. Fələstinlilər Deymon və Megiddo həbsxanalarından İordan çayının qərb sahilindəki Ofer həbsxanasına, oradan isə sərhəd qapısına aparılaraq ailələrinə təhvil veriləcək.
- Gün ərzində Misirdən Qəzzaya humanitar yardımın gəlməsi gözlənilir. HƏMAS hər gün 200 yardım maşınının Qəzzaya girəcəyini bildirir.
Musavat.com
