“Vətən müharibəsi əlillərinə kömək” İctimai Birliyinin sədri Qurban Məmməd oğlu Məmmədovun dələduzluq və sənəd saxtalaşdırmağa görə 2 dəfə məhkum edilməsi haqda “Yeni Müsavat”ın ötən sayında yazmışdıq.
2 dəfə qrup şəkilində dələduzluğa, sənəd saxtalaşdırmağa görə məhkum edilən sədr!
2011-ci ildə Bakı Ağır Cinayətlər Məhkəməsi, 2018-ci ildə isə Sabunçu Rayon Məhkəməsi Qurban Məmməd oğlu Məmmədovun sənəd saxtalaşdırmaqla, etibardan sui-istifadə etməklə, bir qrup şəxslə əlbir olmaqla torpaq ələ keçirməsi ilə bağlı cinayət dosyelərini araşdırıblar. Hər iki məhkəmə Qurban Məmmədov barəsində ittihamedici hökm çıxarıb.
Reyder dəstəsinin dövlət torpağına gecə hücumu 100-ə yaxın ağacın sındırılaraq məhvi ilə nəticələnib.
Qurban Məmmədovun personası mətbuatın gündəminə sonuncu dəfə Nərimanov rayonu, Dərnəgül 1 ünvanı ilə Ziya Bünyadov prospektinin kəsişməsindəki dövlətə məxsus səki və yaşıllıq zolağına bir qrup şəxslə birgə reyder hücumundan sonra gəlib. Belə ki, 2021-ci il aprelin 1-də Qurban Məmmədovun ətrafında olan şəxslər əraziyə gecə basqını edərək oradakı 60 xan çinarını, onlarla leylandr və söyüd ağaclarını sındırıb, yaşıllığı məhv ediblər. “Yaşıl terror” ərazidə hər hansı bir yaşıllıq zolağının olmaması və oranın rahat şəkildə zəbt olunmasına hesablanıb. Növbəti gün səhər isə Qurban Məmmədov gecə basqınında iştirak etmiş şəxslərin əhatəsində əraziyə gəlib. Həmin vaxt Nərimanov Rayon Polis İdarəsinin, Rayon İcra Hakimiyyətinin, Ekologiya və Təbii Sərvətlər Nazirliyinin nümayəndələri, telekanalların əməkdaşları ərazidə olub gecə basqını ilə bağlı araşdırma aparıblar. Baş verən “yaşıl terror”la bağlı “Vətən müharibəsi əlillərinə kömək” İctimai Birliyinin sədri Qurban Məmmədov və dəstəkçiləri barəsində Ekologiya və Təbii Sərvətlər Nazirliyinin əməkdaşları tərəfindən protokol tərtib olunub. Qurban Məmmədov və dəstəkçiləri ilə bağlı nazirlik əməkdaşları tərəfindən 12 min manat cərimə edilməklə toplanmış material barələrində cinayət işi başlanılması üçün Nərimanov Rayon Prokurorluğuna göndərilib. Ötən 6 ay ərzində Nərimanov rayon Prokurorluğu “yaşıl terror”la bağlı hər hansı bir addım atmayıb.
Qurban Məmmədov kameralara sənədi 2008-ci ildə aldığını deyir, Əmlak Komitəsi 2021-ci ildə verilən sənədə istinad edir!
Qurban Məmmədov bu ilin aprelində zəbtinə cəhd olunan dövlət torpağında olarkən İTV, Xəzər TV kameraları qarşısında mühasibə verib. Əlindəki kağızları göstərməklə həmin torpağa aid sənəd olduğunu və 2008-ci ildən torpağın onlara verildiyini israrla deyir.
Zəbtinə hazırlıq görülən Dərnəgül 1 ünvanı ilə Ziya Bünyadov prospektinin kəsişməsində yerləşən yaşıllıq sahəsi və piyada səkisi “Magistral Ekspress” ASC-nin giriş-çıxış qapısı və orada fəaliyyət göstərən kiçik sahibkarların iş yerinin önündədir. Kiçik sahibkarlar deyirlər ki, Qurban Məmmədovun mətbuat nümayəndələrinə göstərib 2008-ci ilə aid olduğunu bildirdiyi sənəd ümumiyyətlə, mövcud deyil. Kiçik sahibkarlar bildirirlər ki, hazırda Qurban Məmmədov və onun adından danışanlar ortaya 29 iyun 2021-ci ildə Əmlak Komitəsi tərəfindən verilmiş “1121069551” qeydiyyat nömrəli çıxarış təqdim edirlər. Hansı ki, Əmlak Komitəsinin səkiyə və yaşıllıq zolağına nəinki çıxarış vermək, ümumiyyətlə, icarə müqaviləsi bağlamağa səlahiyyəti yoxdur. Çünki ərazi dövlətə məxsus səki və yaşıllıq zonasıdır. Ora faktiki olaraq heç bir zaman “Vətən müharibəsi əlillərinə kömək” İctimai Birliyinin istifadəsində olmayıb!
“Magistral Ekspress” ASC-nin üzvləri iş yerləri qarşısında baş verən dövlət torpağının zəbtinin qarşısını almaq üçün Nərimanov Rayon Məhkəməsinə iddia təqdim ediblər. Hakim Kəmalə Əmirxanovanın sədrliyi ilə keçirilən məhkəmə iclasında Əmlak Komitəsinin hüquqşünası sözügedən İctimai Birliyə çıxarışın verilməsinə əsas verən sənəd kimi Bakı Şəhər İcra Hakimiyyətinin 646 saylı, 20.07.2000-ci il tarixli, “Əlillərin maddi rifahının yaxşılaşdırılması haqqında” sərəncamı göstərib və təqdim edib.
Komitə hüquqşünasının məhkəməyə təqdim etdiyi 2000-ci ilə aid 646 saylı rəsmi sənədi o zaman Bakı Şəhər İcra Hakimiyyətinin başçısı olmuş Rəfael Allahverdiyev imzalayıb. Kiril əlifbasında yazılan sərəncamın mətni belədir:
- Nərimanov Rayon İcra Hakimiyyəti başçısının 21.01.2000-ci il tarixli, A-134 nömrəli məktubu və Azərbaycan Respublikası Prezidentinin İcra Aparatının 14.04.2000-ci il tarixli, 14 nömrəli məktubu nəzərə alınaraq, Nərimanov rayonu, Dərnəgül 1 və Ziya Bünyadov prospektlərinin kəsişməsində yüngül dəmir konstruksiyalı, tikinti materiallarının satışı və pavilyon quraşdırılması üçün 671 kvadrat metr torpaq sahəsi Qarabağ müharibəsi əlili Qurban Məmmədova icarəyə verilsin.
2.Pavilyon Memarlıq və şəhərsalma baş idarəsi tərəfindən razılaşdırılmış eskiz əsasında ixtisaslaşdırılmış istehsalatda hazırlanmalıdır.
Kiçik sahibkarlar deyirlər ki, 646 saylı sərəncamda Qurban Məmmədovun atasının adının yazılmaması, onun özünün şəxsiyyəti, əvvəllər qrup şəkilində dələduzluğa və sənəd saxtalaşdırmağa görə məhkum olunması onlarda sənədin saxta olmasında əsaslı şübhələr yaradıb. Bundan başqa Əmlak Komitəsinin əsaslandığı həmin rəsmi sənəddə “Vətən müharibəsi əlillərinə kömək” İctimai Birliyinin adı da çəkilmir! Buna baxmayaraq Əmlak Komitəsi 646 saylı sərəncama əsaslanmaqla torpağı “Vətən müharibəsi əlillərinə kömək” İctimai Birliyinə ayırıb?!
Kiçik sahibkarlar sual edirlər: - necə olur ki, torpaq sərəncamla Qurbana, çıxarış İctimai Birliyə verilib?
Və növbəti sualı verirlər:
- Əmlak Komitəsinə təqdim olunan rəsmi sənəddə torpağın Bakı şəhər İcra Hakimiyyəti tərəfindən 2000-ci ildə Qurban Məmmədova ayrıldığı açıq-aydın yazılıb. Komitənin hüquqşünası da deyir ki, çıxarışla torpağı “Vətən Müharibəsi Əlillərinə Kömək” İctimai Birliyin vermişik. Bu cinayətə bərabər qanunsuzluğa kim imza atıb?
Əmlak Komitəsini aldatmağı, saxta sənədi ora soxuşdurmağı bacaran kim ola bilər?
Kiçik sahibkarlar deyir ki, üstəlik Əmlak Komitəsinin hüquqşünası 10.09.2008-ci il 7-5395/17 nömrəli bir məktuba da istinad edir:
-İstinad edilən məktubun faktiki olaraq bu işə aidiyyatı yoxdur. Əmlak Komitəsinin əsas kimi götürdüyü 646 saylı sərəncam isə saxtadır, saxtalaşdırılıb! Bəli, saxtalaşdırmanı əlimizdəki sənədə əsasən sübut edirik. Amma bir məqamı da qeyd etməklə - həmin saxta sənəd Nərimanov Rayon Məhkəməsinə Əmlak Komitəsinin hüquqşünası tərəfindən rəsmi qaydada təqdim olunub. Əslində bu, böyük bir cinayət şəbəkəsinin fəaliyyətidir. Əmlak Komitəsini aldatmağı, saxta sənədi ora keçirməyi bacaran kim ola bilər?
646 saylı sərəncam Nizami rayonuna aiddir, Qurban Məmmədovun adına saxtalaşdırmaqla Nərimanova aid edilib...
Nərimanov Məhkəməsi iddiamızın aidiyyətinin Bakı İnzibati Məhkəməsinin səlahiyyətlərinə daxil olduğunu deyib, baxılmamış saxladı. Aidiyyət üzrə iddianı Bakı inzibatı Məhkəməsinə təqdim etdik.
646 saylı bu sərəncamın saxtalığını sübut edən əsas sənəd də məhz Bakı İnzibati Məhkəməsində üzə çıxdı. Belə ki, iddiamız əsasında araşdırma aparılarkən hakim Səlma Salahova Bakı Şəhər İcra Hakimiyyətinə 646 saylı sərəncamın surətinin təqdim edilməsi ilə bağlı sorğu verdi. Bakı Şəhər İcra Hakimiyyəti Başçısı Aparatının Sənədlərlə və Vətəndaşların müraciətləri ilə iş şöbəsinin müdiri Yaqut Mönsümovanın imzaladığı rəsmi cavaba 646 saylı, 20.07.2000-ci il tarixli sərəncamın surəti əlavə olunaraq məhkəməyə təqdim olundu.
Hakim Səlma Salahova sorğu verir və böyük bir cinayətin üstü açılır...
23 sentyabr 2021-ci ildə hakim Səlma Salahovaya BŞİH-dən təqdim olunan 646 saylı, 20.07.2000-ci il tarixli sərəncamın mətni tamam fərqlidir.
Əmlak Komitəsinə təqdim edilən, Əmlak Komitəsi hüquqşünasının da Nərimanov məhkəməsinə rəsmi şəkildə verdiyi 646 saylı sərəncam Qurban Məmmədovun xeyrinə saxtalaşdırılıb.
646 saylı sərəncam Qarabağ əlili Məcid Abbasova 30 kvadrat metr torpaq ayrılması haqdadır.
646 saylı, “Pavilyon quraşdırılmasına icazə verilməsi haqqında” Sərəncamın əslinin mətnini təqdim edirik:
1.Nizami Rayon İcra Hakimiyyəti Başçısının 21.01.2000-ci il А-134 nömrəli məktubu və Gürcüstan Respublikası Daimi Nümayəndəliyinin 14.04.2000-ci il tarixli, 14 nömrəli məktubu nəzərə alınaraq, Nizami rayonu, 2571-ci məhəllədə yüngül dəmir konstruksiyalı pavilyon quraşdırılması üçün 30 kvadrat metr torpaq sahəsi Qarabağ müharibəsi əlili Məcid Abbasova icarəyə verilsin.
2.Pavilyon Memarlıq və şəhərsalma baş idarəsi tərəfindən razılaşdırılmış eskiz əsasında ixtisaslaşdırılmış istehsalatda hazırlanmalıdır.
Ordu Qarabağda döyüşür, Qurban Məmmədov dəstəsilə Nərimanovda dövlət torpağına hücuma keçir
“Magistral Ekspess” ASC-nin üzvləri olan kiçik sahibkarlar deyirlər ki, onların iş yerlərinin önündə, giriş qapısının düz qarşısındakı 6 sot yaşıllıq zolağı və piyada səkisinin saxta sərəncam, onun əsasında alınan əsassız və qanunsuzluğu göz önündə olan çıxarışla ələ keçirmək cəhdi var.
“Qurban Məmmədov 1 ildən artıqdır ki, “Vətən müharibəsi əlillərinə kömək” İctimai Birliyi üzvləri ilə birgə ərazini zəbt etməyə çalışır, tez-tez reyder hücumlarına baş vururlar. 2020-ci ildə Ordumuz Qarabağda torpaqlarımızı düşməndən təmizlədiyi günlərdə Qurban Məmmədov başının dəstəsi ilə birgə bizim iş yerimizin qarşısına hücuma keçmişdi. Onlar dövlət rəhbərliyinin diqqətinin Qarabağdakı döyüş əməliyyatlarına cəmləndiyini bilib zamanı cinayət əməllərinin gerçəkləşməsi üçün ideal bilmişdilər. Zor gücünə, saxta əlilləri qabağa verməklə reyder hücumunu başa çatdırmağa çalışırdılar. Bu ilin aprelində sonuncu hücumları zamanı kiçik sahibkar Anar Dəmirovu döyüb ağır bədən xəsarəti yetirdilər. Anar Dəmirov ağır vəziyyətdə xəstəxanaya aparıldı. Lakin bu günə qədər bu cinayəti törədənlər cəzalandırılmayıb. Şikayət edirik, Qurban Məmmədov, makler Yusif Allahvrdiyev deyirlər ki, özünüzü yormayın, hamıya iş görmüşük, bizim arxamızda dayanacaqlar. Ad da çəkirlər – Nərimanov icra hakimiyyətinin başçı müavini İradə Mahmudovanın, onun xalası qızının gəlini olan Bakı Kommersiya Məhkəməsinin hakimi Leyla Əliyevanın, nöqsanlara görə cənab nazir tərəfindən yenicə işdən çıxarılan 17-ci polis bölməsinin rəisi İltimas Əsgərovun, onun müavini Ramalın, Əmlak Komitəsi rəhbərliyini arxa-dayaq bilirlər.
Bu cinayəti Azərbaycan Dövləti mütləq araşdıracaq
Biz də bu adamlara deyirik ki, dövlət torpağının saxta sənədlər əsasında zəbt olunması cinayətdir və bu cinayəti Azərbaycan Dövləti mütləq araşdıracaq.
Buna baxmayaraq Qurban Məmmədov dövlət torpağını, iş yerimizin qarşını zəbt etmək üçün havadarlarının dəstəyi ilə, başının dəstəsi ilə birgə dəfələrlə əraziyə hücum edib qanunsuz hərəkətlər ediblər. Biz Nərimanov Rayon İcra Hakimiyyətinin başçısı Abdin Fərzəliyevə, Bakı Şəhər İcra Hakimiyyətinin başçısı Eldar Əzizova müraciətlər etmişik. Abdin müəllim bizə məktub yazaraq bildirib ki, Qurban Məmmədovun zəbtinə çalışdığı torpaq dövlətə məxsusdur və kimsəyə ayrıla bilməz. “Magistral Ekspress” ASC-nin üzvləri olaraq daxili işlər naziri cənab Vilayət Eyvazova, baş prokuror cənab Kamran Əliyevə, Dövlət Təhlükəsizliyi Xidmətinin rəisi cənab Əli Nağıyevə də rəsmi müraciət ünvanlamışıq. Həmin müraciətimizə Bakı Şəhər İcra Hakimiyyəti başçısının 646 saylı hər iki sərəncamını - əslini və Qurban Məmmədovun xeyrinə saxtalaşdırılmışını da əlavə edib araşdırılmasını xahiş etmişik. Ümid edirik ki, müraciətimizə tezliklə baxılacaq. Rəsmi sənədi saxtalaşdıran, həmin sənədi Əmlak Komitəsinə təqdim edən cinayətkar tez bir zamanda cəzalandırılacaq”, – deyə “Magistral Ekspess” ASC-nin üzvləri bildiriblər.
Elşən MƏMMƏDƏLIYEV,
“Yeni Müsavat”
