Türkiyənin paytaxtı Ankara şəhərində Ermənistanın hərbi təxribatına etiraz və Azərbaycan Silahlı Qüvvələrinə dəstək məqsədilə aksiya keçirilib.
APA-nın yerli bürosunun xəbərinə görə, bu gün Ankarada Keçiörən Bələdiyyəsində “Azərbaycan Türk ordusunun üzvüyük” şüarı ilə keçirilən aksiyada bələdiyyə sədri Turğut Altınok çıxış edib.
O, Ermənistanın hücumlarını qınadıqlarını bildirib.
Türkiyə-Azərbaycan parlamentlərarası dostluq qrupu rəhbəri Şamil Ayrım Dağlıq Qarabağ münaqişəsi ilə bağlı beynəlxalq təşkilatların loyal mövqeyini tənqid edib.
23 iyul tarixinin Ağdamın Ermənistan silahlı qüvvələri tərəfindən işğalının 27-ci il dönümü olduğunu xatırladan Azərbaycanın Türkiyədəki səfiri Xəzər İbrahim bildirib ki, Türkiyənin münaqişə ilə bağlı mövqeyi dəyişməz və prinsipialdır.
Aksiyaya Keçiörən Bələdiyyəsinin üzvləri, Ankarada yaşayan azərbaycanlılar, şəhər sakinləri qatılıblar.
