Dekabrın 3-də Demokratiya və İnsan Haqları Mərkəzində əməkdaşlıq edən siyasi partiyaların KAXCP, Müsavat, ADP, , Azadlıq, VİP, Aydınlar, ALDP, AXP, Azad Demokrat partiyalarının sədrlərinin iştirakı ilə toplantısı olub. Bu barədə müsavat.com-a toplantı iştirakçıları məlumat verib. Məlumatda bildirilir ki, toplantıda partiya sədrləri Rusiyanın imperiyapərəst qüvvələrinin ruporu kimi çıxış edən “Rossiya 24” televiziya kanalına müsahibəsində Azərbaycan prezidenti İlham Əliyevin 90-cı illərin əvvəlində ölkədə yerli olmayan əhaliyə münasibətdə dözülməz şəraitin olduğu, onların sıxışdırılması, dövləti cinayətlərə yol verildiyi kimi həqiqətə uyğun olmayan və Azərbaycanın dövlət və milli maraqlarına zidd olan, Azərbaycana qarşı olan qüvvələrin yararlanacağı fikirlər səsləndirməsinini qəbuledilməz hesab etdiklərini bildiriblər: “Azərbaycan tarixində hansı rejimin, siyasi qüvvənin və liderin hakimiyyətdə olmasından asılı olmayaraq milli dözümsüzlük və milli mənsubiyyətə görə sıxışdırılma hallarının yayılmadığı tarixi faktdır. Odur ki, hər hansı, o cümlədən daxili siyasi məqsədlərlə siyasi opponenetlərinə qarşı bu cür ittihamlardan istifadə edilməsinə yol verilməməlidir”.
Toplantıda ALDP sədri Fuad Əliyevin ABŞ-da keçirdiyi görüş barədə məlumat da dinlənilib.
Musavat.com
