ABŞ Federal Ehtiyat Sistemi (FED) bəyan edib ki, ABŞ-ın Rusiya aktivlərini dondurmaq qərarı dollara və Amerika bank sisteminə etimada mənfi təsir göstərmir.
Bu barədə FED-in sədri Cerom Pauel məlumat verib.
Nümayəndələr Palatasının Maliyyə Xidmətləri Komitəsində keçirilən dinləmələrdə millət vəkilləri ondan Rusiya aktivlərinin dondurulmasının ABŞ “dollarının üstünlüyünə və mərkəzi bank sisteminə inama” mənfi təsir göstərib-göstərmədiyini soruşublar. Pauell isə dondurulma qərarından ötən 2 ildə hansısa mənfi təsirin qeydə alınmadığını bildirib.
Qeyd edək ki, Ukraynada işğalçı müharibə başladıqdan sonra Aİ, ABŞ, Yaponiya və Kanada Rusiyanın təxminən 300 milyard dollarlıq aktivlərini dondurub. Bunun təxminən 5-6 milyard dolları ABŞ-da yerləşir, böyük hissəsi Avropada, o cümlədən Belçikadakı Euroclear beynəlxalq platformasındadır.
Musavat.com
