Fevral ayının 4-də 35 saylı Xətai üçüncü seçki Dairəsindən millət vəkilliyinə namizəd Rauf Arifoğlunun seçki qərargahının iclası keçirilib. Toplantıda namizədin fevralın 9-da məntəqələrdə fəaliyyət göstərəcək vəkilləri, səlahiyyətli nümayəndələri, müşahidəçiləri iştirak ediblər.
Rauf Arifoğlu qərargah üzvlərini 35 saylı seçki dairəsində baş verənlərlə bağlı məlumatladırıb və seçki günü onları ayıq-sayıq olmağa, rəqib tərəfin təxribatına uymamağa, onların seçki saxtakarlığı törətməsinə imkan verməməyə çağırıb.
O, qeyd edib ki, hökumətin idarəsi bu seçkinin şəffaf və ədalətli keçməsidir. Seçkinin birinci mərhələsində biz bunu müşahidə etdik ki, hətta namizədliyi gülüş doğuranlara, imzaları şübhə çəkənlərə də yox deyilmədi, onların da namizədliyi qeydə alındı.
Bizim bu dairədə qarşılaşa bildiyimiz yeganə neqativ hallar cığal, oyun qaydalarını pozan, təxribata əl atan rəqibimizin əməlləri ola bilər. Çünki yalnız 35 saylı dairədə bu cür seçki fırıldağı yaşandı, mənim dublikatım, Abbasov Rauf Çərkəz oğlu namizəd kimi gətirildi, bülletenə salındı. Başqa heç bur dairədə belə hal yoxdu. Bundan başqa, rəqibimiz bütün görüşlərimizə təxribatçı qadınlar göndərdi. Bu təxribat və pozuculuq 9 fevralda da ola bilər. Rəqibimiz uduzacağını bilir və buna görə də seçkini pozmağa, təxribatlara hazırlaşır. Bu barədə bizə informasiyalar gəlir, hətta hansı məktəbdə, hansı məntəqədə onun adamlarından kimlərin nə kimi addımlar atacağı da bizə məlumdur- deyə Rauf Arifoğlu bildirib. Onun sözlərinə görə, rəqibinin bu addımlarının səbəbi bu dairədə iddia etdiyi qədər geniş çevrəsi və tərəfdarının olmamasıdır. Əks halda qələbə uğrunda savaşmaq yerinə, seçkini pozmağa çalışmazdı: “Onun hərəkətləri, saxta rəqib hazırlaması istənilən bir siyasətçini bitirə bilən bir addımdır. Bu seçki fırıldağı həmin siyasətçinin nüfuzunu yerlə bir edir. Məqsədi seçicini aldatmaq olan bir şəxs necə deputatlığa iddialı ola bilər...”
Rauf Arifoğlu dedi ki, onun rəqibinin bütün seçki görüşləri də saxtadır: "Orada seçicilər kənardan gələnlərdən dəfələrlə azdır. Qardaşının şirkətində çalışan suvaqçılar, beton tökənlər, asfalt vuranlar, sürücülər, partiya funksionerləri seçici kimi ictimai rəyə təqdim olunur. Onların fotolarına diqqət edin, insanları arxadan çəkirlər. Biz bu saxtakarlığı da təsbit etmişik".
Qərargah sədri Çingiz Özgür rəqib müşahidəçilərin addımlarını diqqətlə izləməyə, onların təxribatçı addımlarına təmkinlə yanaşmağa çağırıb. Bildirib ki, qarşı tərəfdə məqsəd qarışıqlıq salmaq, təxribat törətmək, seçkiyə inamsızlıq yaratmaqdır. Biz buna imkan verməyəcək və ədalətli bir seçkinin baş tutmasına çalışacağıq. Bunun üçün mükəmməl bir plan qurulub və seçki günü qərargah intensiv işləyəcək.
Rauf Arifoğlu bu seçkinin Azərbaycan tarixində ən şəffaf və ən demokratik seçki kimi yadda qalacağını vurğulayıb. Namizəd həmçinin dairə əhalisi arasında sorğu keçirildiyini və nəticələrin 70 faizdən yuxarı özünün xeyrinə olduğunu, bu nəticələrin ictimaiyyətə açıqlanacağını deyib.
Onun sözlərinə görə, hazırki mərhələyə qədər seçki qanunvericiliyinin pozulması ilə bağlı halları əks etdirən faktlarımız da var, məntəqə üzvlərinə rüşvət təklif olunması, vətəndaşlara ət, şəkər tozu paylanmasına qədər bir çox qanunsuz adddımlar atılıb. Bütün bunlara baxmayaraq, fevralın 9-da meydanlara girərək, prosesi qələbə ilə bitirəcəyik.
Daha sonra qərargahın seçki texnoloqu Ruslan İbrahimbəyli seçki günü baş verə biləcək qanun pozuntuları ilə bağlı müşahidəçiləri məlumatlandırıb, onlara öz hüquq və vəzifələrini izah edib.
Qeyd edilib ki, məntəqənin içərisi ilə yanaşı bayırda baş verənlər də izlənəcək, rəqibin hər bir hərəkəti aktlaşdırılacaq. Artıq hansı addımlara əl atılacağı ilə bağlı məlumatlıyıq və bu barədə müşahidəçilərimiz də məlumatlandırılıb. Təxribata getmədən , sakitliyi gözləyərək prosesi qələbə başa çatdıracağıq-deyə bu məqam tədbirin sonunda vurğulanıb.
Nərgiz LİFTİYEVA
Fotolar Məhəmməd TÜRKMƏN
