Qonşu qonşunu küt alətlə vuraraq, xəstəxanalıq edib.
Musavat.com xəbər verir ki, bu hadisə Biləsuvar rayonunun Əsgərabad kəndində baş verib.
1952-ci il təvəlüdlü Mirzə Əliyev öz qonşusu tərəfindən döyülüb. Küt alətlə zərbə nəticəsində 63 yaşlı kişi ağır xəsarətlər alıb.
Xəsarət alanın oğlu Ramiz Əliyev bildirib ki, atasını qonşuluqda yaşayan Zefiyəli Məcidov vurub: “Bir neçə il əvvəl mən qayda-qanunla pulumu verib, qonşuluqdakı evi aldım. Məndən əvvəl isə həmin evi Zefiyəli Məcidov almaq istəyirdi. İndi atamı və məni o həyətə keçməyə qoymur. 6 ay əvvəl aldığımız evin pəncərələrini qırıb. Mən öz həyətimə keçə bilmirəm”.
Ramiz Əliyev bildirib ki, atası aldıqları həyətə sonuncu dəfə keçəndə qonşusu onun başına arxadan küt alətlə zərbə endirib: “Atamı xəstəxanaya çatdırdıq. Əlimizdə onun xəsarət alması ilə bağlı həkim kağızı var. Hadisədən sonra atamda psixoloji problemlər yaranıb. Hüquq-mühafizə orqanlarına müraciət etsək də, hələlik hadisə ilə bağlı araşdırma başlanılmayıb.
Hadisə ilə əlaqədar Biləsuvar Rayon Polis Şöbəsindən musavat.com-a bildirilib ki, şikayətçinin ərizəsi şöbəyə daxil olub. Hazırda döyülmə faktı ilə bağlı tədqiqat aparılır.
Musavat.com
