Vətən müharibəsi qazisi İqbal Səfərov Pirallahı icra başçısı Vasif İmanovun ona “süpürgəçi” işləməyi təklif etdiyini bildirib.
Pirallahı İcra Hakimiyyətindən redaksiyaya zəng edərək dünəndən onların məsələyə münasibətinin mediada yayıldığını xatırladıblar və qarşı tərəfin də mövqeyinin əks olunmasını istəyiblər.
İcra hakimiyyətinin məlumatında deyilir ki, Pirallahı rayonunda şəhid ailələri, müharibə veteranları və iştirakçılarına xüsusi qayğı göstərilir.
“Səfərbərlik Xidməti tərəfindən ehtiyatda olan zabit kimi Vətən müharibəsinə qatılmış İqbal Səfərov Rayon İcra Hakimiyyətində 2 dəfə yüksək səviyyədə qəbul edilmişdir. Torpaqlarımızın erməni işğalçılarından azad olunmasında xidmətlərini nəzərə alaraq İ.Səfərov Rayon İcra Hakimiyyətinin başçısı tərəfindən "Fəxri fərman”la təltif olunmuş və o, səmimi qəbullara və diqqətə görə öz minnətdarlığını bildirmişdir. Bildiririk ki, "Vətən müharibəsi iştirakçıları və şəhid ailələri ilə işin təşkili” şöbəsinə 2 nəfər Vətən Müharibəsi iştirakçısı işə götürüldükdən sonra İ.Səfərov ordudan tərxis olunmuş və rayon icra hakimiyyətinə işlə bağlı şifahi müraciət etmişdir. Qəbullar zamanı o, uzun müddət Naxçıvan Muxtar Respublikasında Gömrük orqanlarında çalışdığını və bundan sonra da orada işləmək istədiyini bildirmişdir. Bununla yanaşı 2 saylı Ərazi Məşğulluq Mərkəzinin müdiri Rahim Əliyevin verdiyi məlumata görə o, 2 dəfə Məşğulluq Mərkəzinə müraciət etmiş və ona ixtisasına uyğun işlər təklif edilmişdir. Lakin İ.Səfərov gömrük orqanlarında işləmək arzusunda olduğunu bildirmiş, təklif edilən işlərdən imtina etmişdir. İ.Səfərov Məşğulluq Mərkəzinin müdiri Rahim Əliyevdən onun gömrük orqanlarında işlə təmin edilməsinə köməklik göstərilməsini xahiş etmişdir. Lakin ona bildirilmişdir ki, bu onların səlahiyyəti çərçivəsində deyil və Gömrük orqanlarında işə qəbul müsabiqə və müsahibə yolu ilə həyata keçirilir. Qeyd edək ki, İ.Səfərova həmçinin Özünüməşğulluq proqramı çərçivəsində paket sənədlər təqdim edilmiş, Məşğulluq Mərkəzinə gəlməsi tövsiyə edilmişdir.
Bildiririk ki, rayon icra hakimiyyətində 2 nəfərlik xadimə ştatı vardır və həmin ştatlar üzrə xanımlar çalışır. Göründüyü kimi, İ.Səfərova süpürgəçi işinin təklif edilməsi absurddur və qeyri mümkündür. Onun gömrük orqanlarından ayrılmasının səbəbləri bizə məlum deyildir. Bu cür vətənpərvər müharibə veteranının hərəkətləri təəssüf doğurur".
Musavat.com
