Ə.Mustafayev deyib ki, həbs olunanların razılığı alınıb və apelyasiya şikayətləri hazırlanıb: “Şikayətlər tezliklə məhkəmələrə təqdim olunacaq”.
Həbs olunanlar:
Tural Abbaslı, Müsavat - 10 sutka
Əhəd Məmmədli, Müsavat - 10 sutka
Vaqif Xalıqov, AXCP - 10 sutka
Şakir Abbasov, AXCP - 10 sutka
Dəyanət Babayev, AXCP - 10 sutka
Rüfət Hacıbəyli, Müsavat - 9 sutka
Təzəxan Mirələmli, AXCP - 8 sutka
Əbülfəz Qurbanlı, AXCP - 8 sutka
Elşad Budaqov, Müsavat - 7 sutka
Şahin Mirzəyev, Müsavat - 7 sutka
Bəhruz Həsənov, AXCP - 7 sutka
Turqut Qəmbər, “Nida” Vətəndaş Hərəkatı - 7 sutka
Ülvi Həsənli, “Azad gənclik” təşkilatı - 7 sutka.
Hüquq müdafiəçiləri 20 oktyabr məhbuslarının azadlığa buraxılması üçün prezident İlham Əliyevə müraciət ediblər. İnsan Hüquqları və Qanunçuluğun Müdafiəsi Bürosunun rəhbəri Səidə Qocamanlı APA-ya deyib ki, müraciət Hüquq-Müdafiə Təşkilatları Monitorinq Qrupunun üzvləri Novella Cəfəroğlu, Səidə Qocamanlı, Səadət Bənəniyarlı və onun tərəfindən imzalanıb. Müraciətdə gənclərin vaxtından əvvəl azadlığa buraxılması xahiş olunub: “Prezidentə müraciət edərək müqəddəs Qurban bayramı ərəfəsində humanistlik göstərərək 20 oktyabrda gənclərin keçirməyə cəhd etdikləri aksiyada saxlanılan 13 gəncin azadlığa buraxılması barədə göstəriş verməsini xahiş edirik”.
Xatırladaq ki, oktyabrın 20-də bir qrup gənc Bakının mərkəzində razılaşdırılmamış aksiya keçirməyə cəhd edib. Aksiya zamanı 13 nəfər saxlanılaraq inzibati qaydada həbs olunub. Aksiyada başlıca tələb parlamentin buraxılması, yeni parlament seçkisinin keçirilməsi olub. Günorta saat 15:00-a yaxın Müsavat Partiyasının qərargahı qarşısında etiraz yürüşü keçirilib. Sonra bir saatdan artıq müddətdə Fəvvarələr meydanında aksiyaçılar etiraz şüarları səsləndiriblər. Polis və mülki geyimlilər gənclərə güc tətbiq edib.
