Cənubi Amerika ölkəsi Ekvadordakı villasından 15 silahlı şəxs tərəfindən qaçırılan britaniyalı milyonçu Kolin Armstronq sərbəst buraxılıb.
İngiltərədə tanınmış iş adamı və keçmiş diplomat olan 78 yaşlı Armstronq şənbə günü səhər sevgilisi Ketrin Paola Santos ilə qaldığı villasından 15 silahlı şəxs tərəfindən qaçırılıb. Sonuncu dəfə avtomobilin arxa oturacağında oturarkən görülən Armstronqun bölgədəki kartelə fidyə ödəməkdən imtina etdiyi və buna görə də qaçırıldığı düşünülürdü.
Ekvador polisi məşhur milyonçunun ikinci ən böyük şəhər olan Quayakilə qaçırıldığı avtomobili təqib edib. Avtomobil sahil bölgəsində boş tapılıb. Bu sırada Armstronqun sevgilisi villada üzərində partlayıcı maddə olan jilet geyindirilmiş vəziyyətdə olub. Bomba zərərsizləşdirmə qrupunun gənc qadını xilas etdiyi anın görüntüləri "X" sosial media platformasında yayılıb.
30 evə basqın edildi, 4 gün sonra yolda tapıldı
Polis məşhur milyonçunun tapılması üçün əməliyyata başlayıb. 30 evdə axtarış aparılan “Libertad 122” adlı əməliyyatda 9 nəfər həbs edilib. Bədən kameralarına qeyd olunan basqınlar zamanı polis 5 əl qumbarası, çoxlu silah, 1500 döyüş sursatı, 30 detonator, 9 telefon və adam qaçırmaqda istifadə edilən 2 avtomobil ələ keçirib. Ekvadorun polis rəisi Sezar Korrea çərşənbə günü britaniyalı milyonçunun qaçırıldığı Los Riosdan uzaq olmayan Manabi yaxınlığındakı yolda tapıldığını açıqlayıb.
4 gündən sonra sərbəst buraxılan Armstronq başında beysbol papağı və yanında iki polisin olduğu fotoda kifayət qədər yaxşı görünüb.
Yerli media iddia edir ki, amansız Meksika karteli “Los Tiguerones” Armstronqun qaçırılmasında əsas şübhəlidir.//Publika.az
