Amerikalı iş adamı kiçik Donald Tramp Men ştatının hakimiyyət orqanlarının atası, ABŞ-ın keçmiş prezidenti Donald Trampın ştatda Respublikaçılar Partiyasının praymerizində iştirakını qadağan etmək qərarını tənqid edib.
Musavat.com xəbər verir ki, o, X sosial şəbəkəsində (keçmiş Twitter) qeyd edib ki, solçu hökumət öz rəqiblərinə qarşı mübarizədə istənilən qiyməti ödəməyə hazırdır.
“Tramp indi Men ştatından kənarlaşdırılıb. Yadda saxlayın, uşaqlar, hakimiyyətdəki radikal sol/marksistlər qaydalara, ədəb-ərkan, etiket və ya gücdən başqa bir şeyə əhəmiyyət vermirlər. Onlar nəyin bahasına olursa-olsun, öz opponentlərini susduracaq və yaxud, həbs edəcəklər. Biz oyanmayana qədər onlara heç nə mane ola bilməyəcək”, - kiçik Tramp yazıb.
Men ştatının dövlət katibi, demokrat Şanna Bellous 2021-ci ilin yanvarında Trampın tərəfdarlarının Kapitoliyə hücumda iştirakını bəhanə edərək eks-prezidentin adını praymerizə qatılası namizədlər siyahısından çıxarıb. Onun fikrincə, ABŞ-ın keçmiş prezidenti ölkə konstitusiyasına edilən 14-cü düzəlişi pozub və “qiyama və ya üsyana” kömək etdiyi üçün seçkilərdə iştirak edə bilməz. Siyasətçinin vəkilləri artıq belə bir hərəkətə etiraz ediblər.
Men ştatının qərarından əvvəl Koloradoda da oxşar qərar verilib. Bununla belə, Kaliforniya, Miçiqan və Missuri ştatlarında Trampı praymerizdən kənarlaşdırmaq mümkün olmayıb.
Bundan əvvəl ABŞ Konqresi Trampın seçkilərdə iştirakına icazə verilməsini istəyib.
Musavat.com
