Tələbə Qəbulu üzrə Dövlət Komissiyasının sədri Məleykə Abbaszadə ixtisas seçimi zamanı abituriyentləri və valideynləri diqqətli olmağa çağırıb. APA-nın xəbərinə görə, TQDK sədri Məleykə Abbaszadə bu gün keçirdiyi mətbuat konfransında deyib ki, artıq III, I və IV ixtisas qrupu üzrə imtahanlar başa çatıb. M. Abbaszadə qeyd edib ki, I və III qruplar üzrə qabiliyyət tələb edən ixtisaslar üzrə imtahanlar yekunlaşıb, IV qrup üzrə abituriyentlər isə tələb olunan ixtisaslar üzrə qabiliyyət imtahanı verir. TQDK sədri qeyd edib ki, avqustun 6-dan etibarən Azərbaycanda ali və 11 illik təhsil bazasından orta ixtisas təhsili müəssisələrinə ixtisas seçimi başlayır. Onun sözlərinə görə, abituriyent ixtisas seçimini özü aparmalı, sonra da kompüterin arxasında oturaraq kodları daxil etməli və təsdiqləməlidir: “Bu prosedurlar zamanı düzgün qərar qəbul etmək üçün abituriyentlərə bütün məlumatları vermişik. I, III və IV qrup üzrə kitabçalar satışa çıxarılıb, kitabçaların elektron formada da satışa çıxarılmasını tapşıracağam. Bundan sonra kitabçaları əldə etməyənlər onları internetdən ala bilərlər. Bundan sonra düzgün qərar qəbul etmək yalnız abituriyentlərdən asılıdır”.
M. Abbaszadə ixtisas seçimi zamanı abituriyentlərə sərbəstlik verilməsi ilə bağlı valideynlərə xəbərdarlıq edib. O qeyd edib ki, ixtisas seçimi aparan zaman abituriyentə 2 məhdudiyyət ailə tərəfindən qoyula bilər: “Bunlardan biri gənc yaşadığı şəhərdə, yoxsa ayrı bir şəhərdə olan ali məktəbi seçməsi, digəri isə abituriyentin dövlət sifarişi yox, ödənişli yerlərdə oxumasına imkanın verilməsidir. Bu iki məsələni valideyn uşaqla birgə müzakirə etməlidir. Amma ixtisas seçimi zamanı qalan proseslərdə valideynlər uşaqlara sərbəstlik verməlidilər”.
“Azərbaycanda IV ixtisas qrupu üzrə qəbul imtahanı verən abituriyentlər aqrar ixtisaslara az meyl göstərirlər. Onlar daha çox tibb ixtisaslarında təhsil almaq istəyirlər. Amma bu gün ölkəmizdə aqrar sahədə mütəxəssislərə tələbat daha çoxdur”, - TQDK sədri deyib. O bildirib ki, tibb ixtisaslarına nisbətən aqrar ixtisasları seçənlər ali məktəbi bitirdikdən sonra daha tez iş tapacaqlar. TQDK sədri qeyd edib ki, 500 baldan az toplayanların 890 yerin olduğu Tibb Universitetinə, xüsusən müalicə işinə qəbul olması şansları azdır: “Aqrar sahədə ixtisasları seçmək hüququ verilən abituriyentlərin sayı 3298 nəfərdir. IV ixtisas qrupu üzrə ayrılan vakant yerlərin 1051-i Bakıdakı, 1093-ü regionlardakı ali məktəblərin, 593-ü Azərbaycan Dövlət Aqrar Universitetinin, 330-u isə özəl ali məktəblərin payına düşür”.
M.Abbaszadə qeyd edib ki, birinci mərhələdə ixtisas seçiminin düzgün aparılması çox vacibdir. Onun sözlərinə görə, nisbətən yüksək bal toplayan abituriyent tutaq ki, daha yüksək bal tələb edən ixtisası seçir, qəbul ola bilmir: “İkinci mərhələdə isə hətta həmin abituriyentin seçdiyi ixtisas üzrə müsabiqə şərti yüksələ və o, qəbul olmaya bilər. Ona görə də valideynlər və abituriyentlər indidən məsələni müzakirə edib qərar verməlidirlər. Digər tərəfdən, valideynlər uşaqların sərbəst ixtisas seçiminə şərait yaratmalıdır. Məsələn, 600-dən yuxarı bal yığan bir qız mənə müraciət edib deyir ki, valideynlərim məni hüquqşünas ixtisasını seçməyə məcbur edirlər, bu balla ora daxil ola bilərəmmi. Həmin qız onu da yazır ki, arzusu əslində tərcümə ixtisası olub. Yəni çox vaxt abituriyentlər valideynlərin təzyiqi altında qalır. Valideynlər övladlarını cəmiyyətdə daha prestijli sayılan ixtisaslarda görmək istəyirlər. Tutaq ki, abituriyent biologiya müəllimi olmaq istəyir, yüksək bal toplayanda isə valideyn onun tibb ixtisaslarına sənəd verməsini istəyir”.
