Londonda Buckingham sarayı önündəki fəxri qarovulun dəyişməsi ənənəsi 357 ildir ki davam edir, lakin Kral Hərbi Dəniz Qüvvələrinin əsgərləri bu mərasimdə ilk dəfədir ki iştirak edib.
BBC xəbər verir ki, fəxri qarovulun dəyişməsi ilə əlaqədar keçirilmiş paradda 86 dənizçi iştirak edib. Parad iştirakçıları Kral Hərbi Dəniz Qüvvələrinin 45 gəmisini təmsil edib. Bazar günü səhər saatlarında keçirilmiş mərasimə hərbi dənizçilər bir ay ərzində hazırlıq aparıb.
Qarovulun dəyişməsi mərasimi hərbi orkestrin müşayiəti ilə keçirilir
Bu fəxri mərasim, bir qayda olaraq, Kral qvardiya diviziyasına daxil olan beş qvardiya alayından birisi tərəfindən həyata keçirilir. Britaniyada 2017-ci il "hərbi dəniz qüvvələri" ili elan olunduğundan, dənizçilərə Buckingham sarayı qarşısında fəxri qarovulun dəyişməsi mərasimində iştirak etmək imkanı verilib.
Parad iştirakçıları Kral Hərbi Dəniz Qüvvələrinin 45 gəmisini təmsil edib
Qeyd edək ki, hərbi dənizçilər eləcə də Londonun St James, Windsor və Tower sarayları önündə də keşik çəkəcək.
Buckingham sarayı qarşısında fəxri qarovulun dəyişməsi Londona gələn turistlərin diqqətini çəkən tamaşalarından biridir
