“Qaydalara ən çox riayət edən biz idik, bizi niyə bağladılar?”,- deyən salon rəhbərləri narazılıq edirlər
14 günlük karantin öncəsi fəaliyyəti dayandırılacaq sahələrindən biri də gözəllik salonlarıdır. Qərar sözügedən məkanlarda çalışan insanlar tərəfindən birmənalı qəbul olunmayıb.
Musavat.com-un əməkdaşı şəhərin bir çox gözəllik salonlarında reyd keçirib, saç-dırnaq ustalarının, vizajistlərin, eləcə də salon rəhbərlərinin bu qərara münasibətini öyrənib.
“KARANTİN QƏRARI VERİLƏN GÜNDƏN TELEFONLARIMIZ SUSMUR”
“Neftçilər” metrostansiyası yaxınlığında fəaliyyət göstərən “Mətanət” gözəllik salonunun rəhbəri Mətanət Xudaverdiyeva deyir ki, karantinlə bağlı bu həftənin cümə axşamı günü açıqlama verilən kimi, telefonları susmayıb. Onun sözlərinə görə, müştəriləri bir saatı belə boş buraxmadan növbəyə yazılıblar: “5-ci və 6-cı gün bir dəqiqə fasilə vermədən işləmişəm. Çox adamın saç boyasının vaxtı çatıb, bir çoxu da bu 15 gündə çıxıb r ayonlara istirahətə gedirlər. Ona görə də saçlarına, qaşlarına diqqət etmək istəyirlər”.
Müsahibimiz deyir ki, sanki Operativ Qərargah onların qəsdinə durub. İlk karantindən sonra təzə-təzə nəfəs almağa başladıqlarını deyən salon rəhbərinin sözlərinə görə, yenidən onları yoxluğa vadar etdilər: “Axı ən məsuliyyətli işləyən sahə biz idik. Camaat mesaj yazırdı, gəlirdi. Heç kəs salonda basabas yaratmırdı, ara məsafəsi qorunurdu. Bütün ustaların iş masasının üstündən spirt əskik olmazdı. Hələ bu günə qədər müştərilərimizin içində koronaya yoluxan olmayıb”.
“ELƏ BİL İŞLƏRİMİZ QIZIŞAN KİMİ BURANI QƏSDƏN BAĞLADILAR"
Manikür ustası Yeganə isə deyir ki, onların işləri təzə-təzə relsə otururdu. Onun sözlərinə görə, havaların isinməsi ilə çimərliyə gedən, yay ayaqqabıları geyinən qadınlar tez-tez pedikür üçün müraciət edirdilər: “Elə gün olurdu ki, səhər tezdən 20 müştəri qəbula yazılırdı. Səhər 10-dan axşama qədər fasiləsiz onları yola salırdım. Elə bil işlər qızışan kimi qəsdən bağladılar buranı. Dezinfeksiyanın ən çox riayət olunduğu məkan elə gözəllik salonudur. Buraları müdiriyyət xlorla yuduzdurur. İki dəfə də dezinfeksiya olunub”.
Yeganə deyir ki, qadınlar dırnaq qaynağı, şellak üçün ən azı 10 gündən bir ona müraciət edir: “O aparatlardan özlərində yoxdur deyə mənim yanıma gəlirlər. Yoxsa onu da özləri edərdilər. Hamı bir-birinə, səliqəli əl-ayaq dırnaqlarına baxıb, həvəslənir. “Sezon” təzə açılmışdı, yenə işimiz yarıda qaldı”.
“ONSUZ DA MÜŞTƏRİ BİZİ EVİNƏ ÇAĞIRACAQ, DAHA ÇOX QAZANACAĞIQ”,- DEYƏNLƏR DƏ VAR...
Amma bu durumdan narahat olmayanlar da var. Şəhərin Nərimanov rayonunda fəaliyyət göstərən gözəllik salonlarından birində çalışan Natella adlı saç ustası deyir ki, onun davamlı müştəriləri var və onlar karantinə görə saç-qaş baxımından, manikür-pediküründən geri qalmırlar: “Alətlərimizi götürüb, evlərinə gedəcəyik. İcazəmizi alacağıq, çalışacağıq ki, işimizi rahat quraq və çatdıraq. Belə işləmək bizə daha çox sərf edir. Mən salonda 50 faizə işləyirəm. Yəni, qazandığımın 50 faizini salona verirəm, gün boyu. Evdən işləyəndə isə heç kimə faiz verməyəcəm. Öz qazandığım özümə qalacaq. Amma təbii ki, salonda oturub müştəri qəbul etmək qapı-qapı düşməkdən daha rahat idi”.
Natella xanımın dediyinə görə, karantindən öncəki son 2 gündə salon müştəri ilə aşıb-daşıb. Qadınlar daha çox dib boyası, saç baxımı, kəsimi üçün axın ediblər. Manikür ustasının növbəsi isə hamısından uzun olub: “Saçı birtəhər yola vermək olur. Qadınlar özləri evdə boya alıb vururlar, bururlar, düzəldirlər. Amma dırnaq üçün şellaq, qaynaq... bunlar xüsusi aparatlarla edilir və bundan heç də hər kəsdə yoxdur. Allah millətimizin canını sağ eləsin, biz ustaları ac qoymayacaq. Bu virusa da lənət olsun, həyatımızı cəhənnəmə çevirdi”.
Eyni salonda çalışan Kəmalə adlı usta isə deyir ki, bu situasiyada ən rahatı kişilərin işidir. Belə ki, bərbərlər bağlı olsa da, kişilər mağazadan bir “stanok” alıb, saçlarını keçəl edəcəklər: “Qadınların elə şansı yoxdur. O mənada qadın salonlarında çalışanlar çörəksiz qalmayacaq”.
Sevinc,
Musavat.com
