İran Rusiyaya çox sayda güclü ballistik raketlər göndərib. Bu isə ABŞ-ın sanksiyaları altında olan iki ölkə arasında hərbi əməkdaşlığı dərinləşdirir.
Musavat.com xəbər verir ki, bu barədə "Reuters" agentliyinin eksklüziv yazısında bildirilir.
Bu barədə agentliyə 6 ayrı mənbədən xəbər daxil olub.
İran mənbələrinə görə, tədarük edilən 400-ə yaxın raket arasında "Fateh-110" ailəsindən olan bir çox qısa mənzilli ballistik silahlar, məsələn, "Zülfüqar" var. Mütəxəssislərin fikrincə, bu raket 300- 700 km (186 və 435 mil) məsafədəki hədəfləri vura bilir.
İranın Müdafiə Nazirliyi və İnqilab Keşikçiləri bu barədə şərh verməkdən imtina edib. Rusiya Müdafiə Nazirliyi də sorğuya cavab verməyib.
İran mənbələrindən biri bildirib ki, daşımalar yanvarın əvvəlində İran və Rusiya hərbi və təhlükəsizlik rəsmiləri arasında keçən ilin sonunda Tehran və Moskvada baş tutan görüşlərdəki razılaşmadan sonra başlayıb.
Adının açıqlanmasını istəməyən digər İran hərbi rəsmisi isə bildirib ki, ən azı dörd raket göndərilib və yaxın həftələrdə daha çox raket göndəriləcək. O, əlavə məlumat verməkdən imtina edib.
Digər yüksək rütbəli İran rəsmisi raketlərin bir hissəsinin Xəzər dənizi vasitəsilə gəmi ilə Rusiyaya göndərildiyini, digərlərinin isə təyyarə ilə daşındığını bildirib.
Daha bir İran rəsmisi isə “Daha çox daşınma olacaq. Bunu gizlətmək üçün heç bir əsas yoxdur. İstədiyimiz ölkəyə silah ixrac etmək icazəmiz var” deyib.
Yazıda qeyd olunub ki, BMT Təhlükəsizlik Şurasının İranın bəzi raketlər, pilotsuz təyyarələr və digər texnologiyaların ixracına qoyduğu məhdudiyyətlər oktyabrda başa çatıb. Bununla belə, Birləşmiş Ştatlar və Avropa İttifaqı İranın Yaxın Şərqdəki etibarlı dövlətlərinə və Rusiyaya silah ixracı ilə bağlı narahatlıqlar fonunda İranın ballistik raket proqramına qarşı sanksiyaları saxlayıb.
Ağ Evin milli təhlükəsizlik sözçüsü Con Kirbi yanvarın əvvəlində ABŞ-nin Şimali Koreyadan əldə edilmiş raketlərlə yanaşı, Rusiyanın İrandan da yaxın mənzilli ballistik silahlar almağa yaxın olmasından narahat olduğunu bildirib.
Nigar HƏSƏNLİ,
Musavat.com
