2024-cü ildə Hindistanın düyü ixracı azalacaq.
Musavat.com xəbər verir ki, ABŞ Kənd Təsərrüfatı Nazirliyi sentyabr ayı icmalında gələn il Hindistandan düyü ixracı ilə bağlı proqnozunu avqust ayı proqnozundakı 19 milyon tondan 17,5 milyon tona endirib. Bu il ixracın 20 milyon ton olacağı gözlənilir.
Nazirlik qeyd edir ki, dünyanın ən böyük düyü ixracatçısı olan Hindistanın tətbiq etdiyi ixrac məhdudiyyətləri fonunda dünya düyü qiymətləri son 15 ilin ən yüksək səviyyəsinə yüksəlib. İyul ayında ölkə əksər düyü növlərinin ixracına qadağa, ardınca qaynadılmış düyü üçün ixrac rüsumu və basmatı növünə minimum ixrac qiyməti tətbiq etdi. İdxalçılar digər əsas təchizatçılar olan Tayland və Vyetnamdan alışa keçdilər ki, bu da ixrac qiymətlərini 2008-ci ildən bəri ən yüksək səviyyəyə çatdırdı.
Qeyd edək ki, 2008-ci ildə ikinci ən böyük düyü ixracatçısı olan Hindistan ixrac məhdudiyyətləri tətbiq edərək qiymətlərin yüksəlməsinə səbəb olmuşdu. 2011-ci ildə məhdudiyyətlər aradan qaldırıldıqdan sonra ölkə dünya bazarına tədarükünü artırdı və növbəti il ən böyük ixracatçı oldu, o vaxtdan bəri bu mövqeyini qoruyub saxlayır. 2022-ci ildə Hindistan qlobal tədarükün təxminən 40 faizini təmin edən növbəti dörd təchizatçıdan bir qədər çox düyü ixrac edib. 2020-ci ildən bəri ölkə xüsusən də Saharadan cənubda yerləşən Afrika ölkələrinə ən aşağı qiymətlərlə ağ düyü tədarük edir. Qiymətlərin kəskin artmasının idxaldan asılı olan bu ölkələrə nəzərəçarpacaq dərəcədə təsir edəcəyi gözlənilir.
İxrac qiymətlərinin əhəmiyyətli dərəcədə artmasına baxmayaraq, bu dəfə ixrac məhdudiyyətləri daha mülayim olduğundan, qiymətlər 2008-ci ilin rekord səviyyəsinə çatmayıb. Bundan əlavə, 2008-ci ildə ixracını dayandıran Vyetnam hazırda tədarükünü davam etdirir.
ABŞ Kənd Təsərrüfatı Nazirliyinin proqnozuna görə, bu il dünya düyü ixracı 53,11 milyon ton (keçən il 56,12 milyon ton) təşkil edəcək. Gələn il tədarük 52,1 milyon tona düşə bilər.
Musavat.com
