Mayın 12-də Milli Məclisin Müdafiə, təhlükəsizlik və korrupsiya ilə mübarizə komitəsinin onlayn iclası keçirilib. Milli Məclisin Mətbuat və ictimaiyyətlə əlaqələr şöbəsindən Musavat.com-a verilən məlumata görə, iclası açan komitənin sədri Ziyafət Əsgərov bildirib ki, gündəlikdəki 4 qanun layihəsini elan edib.
Komitə sədri onlayn iclasda diqqətə çatdırıb ki, hər 4 qanun layihəsi “Əlilliyi olan şəxslərin hüquqları haqqında” 2018-ci il 31 may tarixli Qanunun icrası ilə əlaqədar hazırlanmış və uyğunlaşdırma xarakteri daşıyır. Z.Əsgərov bildirib ki, “Əlilliyi olan şəxslərin hüquqları haqqında” Qanun ölkəmizin qoşulduğu beynəlxalq sənədlərin tələblərinə cavab verməklə, bu sahədə mütərəqqi dünya təcrübəsinə uyğun qanunvericiliyin formalaşdırılmasına xidmət edir. Həmin qanunla bu sahədə mövcud olan bir sıra terminlər dəqiqləşdirilib, o cümlədən “əlil” ifadəsi əvəzinə “əlilliyi olan şəxs”, “əlillik qrupu” ifadəsi əvəzinə “əlillik dərəcəsi”, “qüsur” sözü əvəzinə “pozuntu” sözündən istifadə edilib. Bu da əlilliklə bağlı dövlət siyasətinin mühüm prinsiplərindən olan əlillik əlamətinə görə ayrıseçkiliyin bütün formalarının aradan qaldırılmasına, onların şərəf və ləyaqətinin müdafiəsinə yönəlmişdir. Qeyd olunanlarla bağlı göstərilən qanun layihələrində texniki və terminoloji baxımdan uyğunlaşdırma xarakterli düzəlişlər edilir.
Onlayn iclasda çıxış edən komitə üzvləri Hikmət Məmmədov, Erkin Qədirli, Aydın Mirzəzadə, Bəxtiyar Sadıqov və Nizami Səfərov qeyd olunan dəyişiklikləri yüksək qiymətləndirib, layihə barədə qeyd və təkliflərini veriblər. Müzakirələrdən sonra gündəlikdəki 4 qanun layihəsinin hamısı Milli Məclisin plenar iclasında müzakirəyə tövsiyə edilib. Onlayn iclasda komitə üzvləri Aqil Abbas, Əminə Ağazadə, Kamal Cəfərov, Elşad Mirbəşir oğlu, Oqtay Əsədov, Nurlan Həsənov, Elman Məmmədov və Arzu Nağıyev iştirak edib.
Musavat.com
