Bu gün məşhur "Wikileaks"in təsisçisi Culian Assanjın ekstradisiya və həbs edilməsinin qarşısını almaq məqsədilə Ekvadorun Londondakı səfirliyindən siyasi sığınacaq almasının beş ili tamam olur.
"Report" xəbər verir ki, 2010-cu ilin yayında İsveçdə iki qadının Assanjın Stokholmda olduğu zaman onun tərəfindən cinsi təcavüzə məruz qalması ilə əlaqədar polisə müraciəti əsasında "Wikileaks"in təsisçisinə qarşı istintaq başlanılıb. Daha sonra İsveç hüquq-mühafizə orqanları fəalın həbsi üçün order verib.
C.Assanj 2012-ci ildə "Wikileaks"dəki fəaliyyəti ilə əlaqədar İsveç hökumətinin onu ABŞ-a ekstradisiya edəcəyindən çəkinərək Ekvador hökumətinə siyasi sığınacaq verilməsi üçün müraciət edib. İyunun 19-da Ekvadorun Londondakı səfirliyi ona binasında qeyri-müəyyən müddət qalmaq üçün sığınacaq verib.
Bu il mayın 19-da İsveç prokurorluğu Assanj işi üzrə araşdırmanı dayandırıb. Lakin London polisi səfirliyin binasını tərk edəcəyi təqdirdə onu həbs edəcəyini bildirib.
