Avropa İttifaqı (Aİ) bu il Rusiyadan mayeləşdirilmiş təbii qazın (LNG) alışını azaldacaq.
Musavat.com xəbər verir ki, bunu "Bloomberg" agentliyinə enerji məsələləri üzrə Avropa komissarı Kadri Simson deyib.
"Avropa İttifaqında biz avropalı oyunçulara Rusiyadan LNG alışını azaltmaq üçün təzyiqi tədricən artırırıq və burada yenə də ABŞ-dan tədarüklərə inam vacibdir", - K.Simson bildirib.
O qeyd edib ki, Rusiya ixracından imtina 2024-cü ildə davam etməlidir, lakin Rusiyadan LNG-nin Avropa bazarlarına idxalının qarşısını almaq üçün hələ çox iş görülməlidir. Bundan əlavə, Simson hesab edir ki, Avropa İttifaqı Ukrayna ərazisindən boru kəməri qazının tranzitinin dayandırılmasına tədarük üçün heç bir xüsusi risk olmadan tab gətirəcək.
2023-cü ildə Aİ Rusiyadan boru kəməri qazının idxalını 5 dəfə azaldıb, lakin eyni zamanda Rusiyadan mayeləşdirilmiş təbii qazın alışını əhəmiyyətli dərəcədə artırıb - 15 milyon tona qədər ki, bu da 2021-ci il səviyyəsindən 38 faiz çoxdur. Bu barədə Rusiya baş nazirinin müavini Aleksandr Novak martın 11-də "Ekspert" jurnalına müsahibəsində bildirib.
Martın 4-də Avropa komissarı Aİ Şurasının energetika nazirləri səviyyəsində keçirilən iclasından sonra baş tutan mətbuat konfransında da bildirib ki, Avropa İttifaqı 2025-ci ildən etibarən Ukraynadan qaz tranzitindən imtina edəcək, lakin Ukrayna qaz nəqli sistemindən istifadəni davam etdirmək niyyətindədir. Söhbət Ukrayna anbarlarına qış üçün ehtiyatların toplanmasından gedir.
Musavat.com
