AVRO-2020-nin seçmə mərhələsinin IX turu davam edir.
Apasport.az saytının məlumatına görə, turun ikinci gününə start verilib.
Günün ilk oyun sessiyasında 3 matç baş tutub. F qrupunda Norveç Farer adlarımı 4 cavabsız qolla darmadağın edib.
J qrupunda Finlandiya Lixtenşteynin qapısından üç cavabsız qol keçirib. Bu, skandinaviyalıların 2-ci yeri təmin etməsi üçün yetərli olub.
Skandinaviyalılar qrup qalibi olan İtaliya ilə birlikdə AVRO-2020-yə yüksəlib. Finlandiya tarixində ilk dəfə böyük turnirin final mərhələsində oynayacaq. İndiyədək dünya və Avropa çempionatına çıxa bilməyən şimallıların ilki 12 şəhərdə, o cümlədən Bakıda keçiriləcək AVRO-2020-də reallaşacaq.
Qrupun digər matçında Yunanıstan Ermənistanı 1:0 hesabı ilə məğlub edib. Günün digər oyunları isə saat 23:45-də başlayacaq.
Qeyd edək ki, final mərhələsinə vəsiqə qazanan komandaların sayı 11-ə çatıb. Bunlar Belçika, Polşa, Ukrayna, Rusiya, İspaniya, İtaliya, Türkiyə, Fransa, İngiltərə, Çexiya, Finlandiyadır.
AVRO-2020-nin seçmə mərhələsi
VIII tur
15 noyabr
F qrupu
21:00. Norveç – Farer adaları – 4:0
Reginiussen, 4, Fossum, 6, Sorlot, 62, 65