24 fevral tarixində ALDP qərargahında Antiböhran Koalisiyası işçi qrupunun iclası keçirilib. Musavat.com-un məlumatına görə iclasda:
1. Qanunvericilik təşəbbüsü hüququ və qanun qəbul etmə səlahiyyəti olan orqanlar qarşısında Xocalı soyqırımının tanınması haqqında Azərbaycan Respublikası qanununun qəbul edilməsi məsələsinin qaldırılması qərara alınıb. Xüsusi olaraq vurğulanıb ki, həmin qanunda həmçinin Azərbaycan Respublikası ərazisində Xocalı faciəsinin soyqırımı hadisəsi kimi inkarı, şübhə altına alınması kimi halların qadağan edilməsi və bu qadağanın pozulmasına görə məsuliyyət müəyyən edilməsi təsbit olunmalıdır. Antiböhran Koalisiyasına daxil olan təşkilat üzvlərinin 26 fevral 2016- cı il tarixdə Xocalı abidəsini birgə ziyarət etmələri və həmin gün saat 14.00 –da Xətai metro stansiyasının çıxışı qarşısında yığışmaları tövsiyə olunub;
2. Parlamentin buraxılmasına dair referendum keçirilməsi haqqında qərar qəbul edilməsi üçün imza toplanması və bu məqsədlə tədbirlərə, o cümlədən hüquqi - texniki işlərə başlamaq haqqında qərar qəbul edilib;
3. İctimai- siyasi təşkilat və vətəndaşların nümayəndələrinin 21 fevral 2016-cı il tarixli toplantısının tövsiyələrinə uyğun olaraq, bundan sonra bu tipli tədbirlərin açıq havada, mitinq formasında keçirilməsini təmin etmək üçün kütləvi aksiyalar üzrə təşkilat komitəsi yaradılsın. Nəzərdə tutulur ki, ilkin mərhələdə təşkilat komitəsi funksiyası Antiböhran Koalisiyası işçi qrupu tərəfindən həyata keçiriləcəkdir. Mümkün qədər ən tez bir zamanda təşkilat komitəsi ictimai toplantı iştirakçılarından ibarət geniş tərkibdə formalaşdırmaq razılaşdırılıb.
Musavat.com
