22 may tarixində ABŞ Konqresində Xəzər Siyasət Mərkəzinin təşkilatçılığı ilə Trans-Xəzər regionuna həsr olunmuş xüsusi brifinq keçirilib.
Brifinqdə Azərbaycan, Əfqanıstan, Türkiyə, Gürcüstan, Özbəkistanın ABŞ-dakı diplomatik nümayəndəliklərin rəhbərləri ilə yanaşı Əfqanıstanın Xarici İşlər Nazirliyinin baş direktoru Həsən Suruş və Türkiyənin Xarici İşlər Nazirinin müavini Yavuz Selim Kıran iştirak ediblər.
Tədbiri giriş sözü ilə açan Xəzər Siyasət Mərkəzinin idarə heyətinin üzvü Robert Sekuta qonaqları salamlayıb. Daha sonra Xəzər Siyasət Mərkəzinin idarə heyətinin digər üzvü Riçard Houqland moderator qismində çıxış edərək, Trans-Xəzər regionunun böyük potensilanı və üstünlüklərini vurğulayıb, belə tədbirlərin ABŞ-ın paytaxtında keçirilməsinin əhəmiyyətini, cəlb olunmuş dövlətlər arasında əməkdaşlığın daha da artırılmasında və bunun ölkələrin iqtisadi inkişafında vacibliyini qeyd edib.
Brifinqin ilk çıxışını edən Türkiyənin Xarici İşlər Nazirliyinin müavini Yavuz Selim Kıran ABŞ-ın Türkiyə ilə İraq və Əfqanıstandakı birgə çalışmalarını qeyd edərək, Ankara ilə Vaşinqtonun müttəfiqliyinin uzun müddətli olduğunu bildirib.
Türkiyənin Trans-Xəzər ölkələri ilə münasibətlərinin yüksək səviyyədə olduğunu və çoxtərəfli əlaqələri dəstəklədiyini qeyd edən Yavuz Selim Kıran Bakı-Tbilisi-Ceyhan neft kəməri, Bakı-Tbilisi-Kars dəmir yol xətti kimi irimiqyaslı layihələrin regionun inkişafında böyük rol oynadıqlarını vurğulayıb.
Daha sonra söz Əfqanıstanın Xarici İşlər Nazirliyinin baş direktoru Həsən Suruşa verilib. O, ABŞ-ın digər beynəlxalq tərəfdaşlarla birgə regionun inkişafına çox böyük töhvələr verdiyini bildirib. Həsən Suruş Xəzər regionu ölkələri ilə Əfqanıstan arasında olan münasibətlərin əsrlər boyu mövcud olduğunu qeyd edib. Region ölkələrinin əlaqələrin qurulmasında Əfqanıstanın böyük rol oynadığını bildirib.
Xəzər regionun unikal olduğunu bildirən Azərbaycan Respublikasının ABŞ-kı səfiri Elin Süleymanov öz çıxışında Azərbaycanın regional inkişafın dəstəklədiyini qeyd edib. Səfir Elin Süleymanov enerjinin hal-hazırda Şərq-Qərb dəhlizinin əsasını təşkil etdiyini vurğulayıb və bu siyasətin gerçəkləşməsində Azərbaycanın böyük rolunu vurğulayıb.
Bununla yanaşı səfir yalnız enerji sahəsində deyil, digər sahələrdə də münasibətlərin inkişaf etdirilməsinin vacib olduğunu qeyd edib. Azərbaycan-ABŞ əlaqələrinə toxunan Elin Süleymanov, iki ölkə arasındakı əhəmiyyətli investisiya tərəfdaşlığının mövcüd olduğunu vurğulayıb.
Daha sonra Gürcüstanın ABŞ-kı səfiri David Bakradze çıxış edib. O, öz çıxışında ABŞ-ın Gürcüstan üçün strateji tərəfdaş olduğunu bildirib, ölkəsinin Trans-Xəzər regionunda münasibətlərinin inkişafı üçün vacib rol oynadığını qeyd edib.
Tədbirdə çıxış edən Özbəkistanın ABŞ-kı səfiri Cavlon Vahabov yalnız Qafqaz üçün deyil, bütün Orta Asiya regionu üçün mərkəz ola biləcəyini qeyd edib, bu ölkələrlə əlaqələrin inkişafının, ticarət potensialının artırılımasının, islahatların aparılmasının vacibliyini vurğulayıb.
Brifinqdə Xəzər Siyasət Mərkəzi və ABŞ Ticarət Palatasının mayın 23-də Azərbaycan, Əfqanıstan, Gürcüstan, Qazaxıstan, Türkiyə, Türkmənistan və Özbəkistan səfirliklərinin dəstəyi ilə Vaşinqtonda keçiriləcək dördüncü Trans-Xəzər Forumu haqqındada geniş məlumat verilib.
ABŞ Ticarət Palatasının Vaşinqtondakı baş ofisində keçiriləcək növbəti Trans-Xəzər Forumu Birləşmiş Ştatlar və Xəzər regionu ölkələrindən olan biznes liderləri, xarici siyasət mütəxəssisləri və dövlət rəsmilərini bir araya toplayaraq onlara yeni istiqamətləri araşdırmaq və yeni imkanları müəyyən etmək üçün platforma yaradır. Forum 2016-cı ildən ardıcıl olaraq hər il keçirilir.
Qeyd edək ki, Xəzər Siyasət Mərkəzi Vaşinqtonda yerləşən müstəqil, qeyri-kommersiya tədqiqat mərkəzidir. Xəzər regionunun iqtisadi, siyasi, enerji və təhlükəsizlik məsələləri Xəzər Siyasət Mərkəzinin əsas tədqiqat obyektini təşkil edir.
