Sənəddə dövlət qurumlarının internet saytlarının monitorinqinin nəticələri üzrə reytinq sıralaması ifadə olunub. Sonuncu beşlikdə Dini Qurumlarla İş üzrə Dövlət Komitəsinin (şəffaflıq indeksi 13.97%), Sənaye və Energetika Nazirliyinin (11.61%), Əsir və itkin düşmüş, girov götürülmüş vətəndaşlarla əlaqədar Dövlət Komissiyasının (9.56%), Milli Təhlükəsizlik Nazirliyinin (8.95 %) saytı yer alıb. Bakı Metropoliteni İdarəsinin saytı sonuncu pillədədir, bu qurumun şəffaflıq indeksi 3.84% təşkil edir.
İlk beşliyə Mərkəzi Bankın (şəffaflıq indeksi 39.36%), Dövlət Neft Fondunun (42.15%), Hesablama Palatasının (42.29%), Vergilər Nazirliyinin (46.15%) saytları daxildir. Birinci pillədə Baş Prokurorluğun saytı (şəffaflıq indeksi 49.46%) yer alıb.
Dövlət büdcəsindən maliyyələşən 2 media quruluşunun - AzTV və İctimai Televiziya və Radio Yayımları Şirkətinin (İTV) internet saytı da monitorinq olunub. İTV-nin saytı 67 qurum arasında 51-ci (şəffaflıq indeksi 18.48%), AzTV-nin saytı isə 59-cu (16.58%) sırada yer alıb.
Azərbaycanın dövlət qurumlarının ortalama online şəffaflıq indeksi 24,36 faiz təşkil edir.
