İnsanlara hürriyət, millətlərə istiqlal!

Eynulla Fətullayev Lalə Şövkətin oğlu ilə iş birliyindən danışdı

3202 30.07.2014 19:15 Ölkə A A

Yaxın günlərdə “Azeri Daily” adlı yeni analitik-informasiya saytı fəaliyyətə başlayacaq. İngilis dilində olacaq bu nəşrin baş redaktoru haqqin.az portalının aparıcı müəlliflərindən biri olan Sidqi Şövkətdir. Sidqi Şövkət ALP lideri Lalə Şövkət Hacıyevanın oğludur. 
Qeyd edək ki, hüquq üzrə fəlsəfə doktoru olan Sidqi Şövkət Britaniyanın məşhur Oksford Universitetinin məzunudur. O, bir ilə yaxındır ki, Eynulla Fətullayevin təsisçisi olduğu haqqin.az portalı ilə əməkdaşlıq edir.

“Azeri Daily” saytı təkcə Azərbaycanın yox, ümumən bütün Qafqaz regionunun ictimai-siyasi və sosial-iqtisadi həyatını, bu bölgədə baş verən prosesləri işıqlandıracaq.

Yeni ingilisdilli saytın təsisçisi Eynulla Fətullayevdir. O, yeni elektron nəşrin fəaliyyətə başlamasını zəruri edən səbəbləri virtualaz.org saytına şərh edərkən bildirib ki, bu nəşr əsasən xarici oxucu auditoriyasına hesablanıb.

Sidqi Şövkət virtualaz.org saytına açıqlamasında bildirib ki, “Azeri Daily” portalı online rejimdə işləyəcək və gün ərzində müntəzəm olaraq yenilənəcək.

Bu xəbərin mətbuatda yayılmasından sonra bir çoxları sosial şəbəkələrdə müxtəlif statuslar yazdı. Bir Xüsusən də E.Fətullayevlə Lalə Şövkətin münasibətlərinin gərgin olduğunu əsas gətirənlər bu xəbəri təəccüblə qarşıladıqlarını deyiblər. 

E.Fətullayev musavat.com-a açıqlamasında bildirib ki, 1 ildən artıqdır ki, S.Şövkətlə əməkdaşlıq edir: “O, demək olaraq hər gün saytımızda siyasi şərhlərlə, analitik məqalələrlə çıxış edir”.

L.Şövkətlə münasibətlərini soruşduqda E.Fətullayev “Lalə Şövkət xanıma mənim böyük hörmətim var”-dedi: “Onunla həmişə yaxşı münasibətlərimiz, ünsiyyətimiz olub. Amma Sidqi Şövkətə qalanda, o, müstəqil şəxsdir. Çox qabiliyyətli, analitik təfəkkürə malik, istedadlı qələmə sahibi bir gəncdir. Oksford universitetində oxuyub, fəlsəfə doktorudur, yaxşı publisistdir və məncə bu işin öhdəsində çox yaxşı gələcək. Həm də ona görə ki, ingilis dili onun üçün doğma dil kimidir. Məncə, xarici ölkələrdə Azərbaycanla bağlı xəbərlərə, şərhlərə və analitikaya böyük zərurət var. Nəzərə alsaq ki, indiyədək ingilis dilində keyfiyyətli resurs yaradılmamışdı, məncə bu layihəyə böyük maraq olacaq. Biz həm də xaricdən bir neçə eksperti də işə cəlb etmişik, bizim üçün yazacaqlar. Azərbaycanın həm regionda, həm də dünyada geosiyasi çəkisi artır. Məhz ona görə də ölkəmizdə ingiliscə də yaxşı resurs olmalıdır. Məsələn, politoloq Teodor Karasik, ekspert Ariel Koen və digərləri bizə yazacaq. Məncə yazar heyəti hələ genişlənəcəkdir”.

Fəridə Abdıyeva

Bizim partnyorlarımız

XƏBƏR LENTİ

BÜTÜN XƏBƏRLƏR