İnsanlara hürriyət, millətlərə istiqlal!

FAZİL MUSTAFA İLQAR MƏMMƏDOVA CAVAB VERDİ

7268 18.02.2013 11:52 Son xəbər A A

Böyük Quruluş Partiyasının sədri, deputat Fazil Mustafa həbsdə olan REAL sədri İlqar Məmmədovun həbsxanadan göndərdiyi ismarışa cavab verib. Musavat.com-un məlumatına görə, Fazil Mustafa İlqar Məmmədovun sözlərinə özünün Facebook səhifəsində münasibət bildirib

“Mən Nelson Mandela deyiləm…” Bəs mən nə deyirdim? Sən Nelson Mandela deyilsən. Nelson Mandela şəxsiyyət idi. Nelson Mandela deyilsənsə, demək, şəxsiyyət də deyilsən.
Nelson Mandela prinsip adamıydı. Nelson Mandela deyilsənsə, demək, prinsip adamı da deyilsən.

Nelson Mandela idealist idi. Heç şübhəsiz, sən idealist də deyilsən. O, 28 il oturmuşdu, bir dəfə də olsun özünün cümhuriyyətə bərabər bir dəyər olduğunu dilə gətirmədi, sən həbsdə 28 gün oturmamısan, özünü cümhuriyyətə bərabər dəyər olaraq təqdim etdin. İndi mən Nelson Mandela olmayanı necə müdafiə edim?

Mən bunu, sadəcə, həbsdə oturan birisi haqqında yazmıram. Allah kimsəyə həbsxana həyatı qismət etməsin, o cümlədən də İlqar Məmmədova. Hətta həbsdə olmasının da əsaslılığı barədə bir söz söyləməmişəm. Sadəcə, bildirmişəm ki, adam bütün deputatları təhqir etmiş və üzr istəməmiş. Bəzi deputatların onu müdafiə etməsinin də məntiqli olmadığını söyləmişəm. Məsələn, Əkrəm Əylisli də şəxsən məni söyməmiş, Azərbaycan xalqını aşağılamış, eyni məntiqlə gərək biz onu da müdafiə edək.

Bu yazı ümumi bir münasibətimdir Nelson Mandela ola bilməyənlərə. Xalq hərəkatı başlarkən cəbhədə olan KQB-nin qışqırıqçıları, avantüristləri hamıdan çox söyürdülər, təhqir edirdilər Mütəllibov hakimiyyətini. Barışmaz qəhrəmanlara çevrilmişdilər. Əbülfəz bəy başda olmaqla yüzlərlə təmiz niyyətli cəbhəçi mədəni siyasi üslubdan kənara çıxmadılar, səmimi mübarizələrini apardılar. Hakimiyyətə gələnə qədər arxayın addımlar atan bu avantüristlər daha cəsur obrazları ilə üstünlük qazandılar və strateji postlarda vazkeçilməz oldular. Rüşvəti də onlar aldılar, Xalq Cəbhəsinə hörmətsizliyi də onlar gətirdilər. Hakimiyyətin devrilməsi zamanı əksəriyyətinin kimliyi az-çox bəlli oldu. Nə olsun? Hakimiyyətin devrilməsinin bədəlini o səmimi, mədəni cəbhəçilər, müsavatçılar ödəməli oldular.

Bu gün klassik KQB yoxdur. Onun əvəzinə CİA var. Yenə də səmimi mübarizə aparanlar mədəni üslubdan kənara çıxmır. Arxasında cəmiyyətin dəstəyi olanlar, siyasi mübarizə təcrübəsi olanlar, Avropa Şurasından, ATƏT-dən, səfirliklərdən təminatı olmayanlar daha ehtiyatlı və ardıcıl şəkildə öz prinsipləri üçün mübarizə aparırlar. Həbsxanada da daha uzun müddət yatırlar, ancaq özlərinə nəinki cümhuriyyətlə, heç Rəsulzadə ilə, Elçibəylə bərabər dəyər olaraq qiymət vermirlər. Sanki biriləri daha cəsur görünərək, hakimiyyətə istədiyi ölçüdə təhqirlər yağdıraraq gələcək situasiya üçün bir addım öndə görünməyə çalışırlar.

Ancaq arada bir sual edin ki, adam təkcə hakimiyyəti söymür, İsa Qəmbəri də, Rəsul Quliyevi də, başqalarını da söyür. Prinsipcə onsuz da zəifləmiş müxalifət cinahında bir-birinə dayaq olmaq əvəzinə, bir-birini qəfildən düşməncəsinə söyməyə başlayırlarsa, bəlkə bunu yalnız emosiyalarla əlaqələndirməyəsiniz. Mən Azərbaycanın gələcəyində tərbiyəsizlərin, avantüristlərin üzərimizə çıxmaması üçün İlqar Məmmədovu müdafiə etmirəm. Mən gələcəyimizdə vətəni canı ilə qorumuş, səmimi mübarizə yolçularının həbsxanada olmayacağı, sayğı görəcəyi bir cəmiyyət qurulması üçün Tofiq Yaqublunu müdafiə edirəm.

Sən məni bağışlamayacağını söyləyirsən. Bu, əlbəttə, sənin haqqındır. Ancaq mən səni bağışlayıram. Çünki sən Nelson Mandela deyilsən. Heç uzun bayrağını səmimiyyətlə sevən Elman Türkoğlu da deyilsən. Sadəcə, 90-cı illərin avantüristlərinin yeni libasda peyda olan prototipisən. Mən isə 90-cı illərin Azərbaycan idealını bir daha avantüristlərin öhdəsinə buraxmaq istəməyənlərin yeni vizyonla çıxış edən təmsilçisiyəm. Ancaq “Həbsxana tamaşası” oynayaraq səni Nelson Mandela etmək istəyənləri heç cür bağışlamayacağam...

Bizim partnyorlarımız

XƏBƏR LENTİ

BÜTÜN XƏBƏRLƏR