Bu günlərdə Azərbaycan Milli Elmlər Akademiyasının İnsan Hüquqları İnstitutunun xətti ilə "Unikal” qəzetinin baş redaktor müavini Eldəniz Elgünün "Erməni psixologiyası” kitabı işıq üzü görüb.
Bu barədə açıqlama verən Eldəniz Elgün bildirib ki, bu kitab üzərində bir neçə il idi ki, işləyirdilər və əsas məqsəd qondarma erməni "soyqırımı”nın 100 illiyi öncəsi ermənilərin əsl kimliyini dünyaya tanıtmaq olub. Onun sözlərinə görə, kitabda erməni toplumunun dini baxışları, kişi və qadınlarının ayrı-ayrılıqda psixoloji sistemi bütün qabarıqlığı və detalları ilə açıqlanıb. Eldəniz Elgün onu da qeyd edib ki, bu kitabı oxumaqla erməni toplumunun alt və üst maraqlarını tamamilə öyrənmək olar: "Bir neçə əsrdir ki, türk toplumuna nifrətlə yanaşan ermənilərin əsl kimliyini heç vaxt öyrənməyə cəhd etməməyimiz çox ciddi problemdir. Amma "Erməni psixologiyası” bu istiqamətdə bir ilk olacaq və ermənilərin kimliyini ermənifobiyaya qapılmadan öyrənmək mümkün olacaq”.
Kitabın elmi redaktoru Azərbaycan Elmlər Akademiyasının İnsan Hüquqları İnstitutunun direktoru, millət vəkili Aytən Mustafayeva isə bildirib ki, Elmlər Akademiyası bu istiqamətdə araşdırmalara start verib və "Erməni psixologiyası” kitabı institutun gördüyü uğurlu layihələrdən biridir. Aytən Mustafayeva deyib ki, bu kitabın tək Azərbaycanda yox, həmçinin, Avropada da yayımına çalışacaqlar.
Kitabın redaktoru və "erməni toplumunun mədəniyyəti” fəslinin müəllifi Türkan Azad da açıqlamasında bildirib ki, bu kitab ilkin mərhələ üçün yığcam olaraq dərc edilib. Amma bunun daha geniş variantı da hazırdır və çalışacağıq ki, bu kitab həm də bir dərs vəsaiti kimi qəbul edilsin.
Onu da nəzərə çatdıraq ki, kitabın ekspert heyəti də var. Heyətə Samirə Abdullayeva, Zaur Əhməd, Fərid Şahbazlı və Elnur Eltürk daxildir. Kitab "Çaşıoğlu” nəşriyyatında çap olunub. "Erməni psixologiyası”nı Bakının kitab mağazalarından əldə etmək mümkündür.
