“Səfir olsaydım, Azərbaycanı necə təbliğ edərdim” layihəsi keçirilib
Noyabrın 28-də Gəncə şəhərində “Səfir olsaydım, Azərbaycanı necə təbliğ edərdim” layihəsi çərçivəsində dəyirmi masa keçirilib.
Musavat.com-un verdiyi xəbərə görə Demokratik İslahatçı Gənclər İctimai Birliyi Azərbaycan Prezidenti yanında Gənclər Fondunun maliyyə dəstəyi ilə baş tutan tədbirdə mərkəzi informasiya vasitələrinin fəaliyyət görstərən jurnalistləri, yerli mətbuat orqanlarının əməkdaşları, blok və xəbər saytlarının rəhbərləri və dövürü mətbuatla fəal əməkdaşlıq edən gənclər iştirak edib.
Layihənin rəhbəri, Demokratik İslahatçı Gənclər İctimai Birliyinin sədri Vüsalə Hüseynli giriş sözü ilə çıxış edərək layihənin əsas məqsədi barədə tədbir iştirakçılarına məlumat verib. O, bildirib ki, tədbirin keçirilməsində əsas məqsəd Azərbaycan həqiqətlərini, Qarabağ problemini dünyaya daha yaxından tanıtmaq məqsədilə mətbuat sözünün təsir gücündən səmərəli istifadəyə nail olmaq, eləcə də Azərbaycan haqqında beynəlxalq aləmə daha dolğun və obyektiv məlumatlar çatdırmağa kömək göstərməkdir:
“Layihənin öncə Gəncədən start verilməsi şəhərin 2016-cı il Gəncə Avropa Gənclər Paytaxtı kimi seçiliməsidir. Bura artıq turistlər çox gəlib gedir, beynəlxalq gənclər təşkilatı mütəmadi səfərlər edirlər və biz də düşündük ki, gələn il öncəsi olaraq media nümayindələrinə dəstək olaraq, belə bir layihə həyata keçirək. Bu eyni zamanda, Gəncənin gənclər paytaxtı kimi tanıdılması üçün beynəlxalq aləmdə bir kompaniya aparılmasına dəstək olsun”.
Daha sonra dəyirmi masa ətrafında jurnalistlərin və gənclərin bu sahədə üzərinə düşən vəzifələr ətrafında qızğın müzakirə aparılıb, müxtəlif fikir və təkliflər irəli sürülüb, beynəlxalq media səhifələrində Azərbaycanın təbliğində lobbiçilik siyasətinin qurulması və ondan səmərəli istifadə edilməsi xüsusi vurğulanıb.
Tədbirdə iştirak edən Aqrar Universitetinin tələbələri xüsusi fəallıq göstəriblər. Müzakirələrdə yaxından iştirak edən tələbələr vurğulayıblar ki, Azərbaycanı dünyaya tanıtmaq üçün ilk növbədə yüksək səviyyəli təhsil və biliyə malik olmaq, tarix və mədəniyyətimiz, tarixi abidələrimizə daha yaxından bələd olmaq lazımdır.
Müzakirələrdə ölkənin aparıcı medialarından Azvision.az, Lent.az, Modern.az, Yeni Azərbaycan, “Yeni Musavat”, Kaspi, Sia.az, Report.az Aznews.az və digər media qurumlarının nümayəndələri də çıxış edərək, təkliflər səsləndiriblər. Bildirilib ki,
Azərbaycan həqiqətlərini olduğu kimi dünyaya çatdırmaq üçün təhsillə yanaşı hər kəs fərdi olaraq vətənpərvər olmalı, bir neçə dildə danışmağı bacarmalı, müasir informasiya texnologiyalarının yaratdığı imkanlardan kifayət qədər səmərli istifadə etmək lazımdır.
Sonda layihənin rəhbəri Vüsalə Hüseynli bildirib ki, Gəncədən sonra növbəti tədbirlər İsmayıllı və Bakının müxtəlif rayonlarında şəhərlərində keçiriləcək.
Qeyd edək ki, tədbir iştirakçılarına layihə ilə bağlı olaraq “Jurnalist nəyi bilməlidir” mövzusunda bukletlər paylanılıb.
Xalidə Gəray
Musavat.com