Qazaxstanın Çimkənd vilayətində qurulan Turan şəhərində qurultay davam edir. Xəbər verdiyimiz kimi, qurultayda Azərbaycan da geniş nümayəndə heyəti ilə iştirak edir.
"Yeni Çağ" (www.yenicag.az) qəzetinin baş redaktoru Aqil Ələsgərin musavat.com-a dediyinə görə, Turan Qurultayında Azərbaycan nümayəndə heyəti Qarabağ sərgisi təşkil edib: "Azərbaycan Türkiyə Evi, Dünya Azərbaycanlıları Konqresi, ATXƏM, Borçalı Cəmiyyəti, "Yeni Nəfəs" Hərəkatı və "Azərmedia" Araşdırmalar Qrupunun üzvləri gətirdikləri kitab, broşura və disklərdən ibarət sərgi təşkil etdilər. Həm Qarabağ, həm də Azərbaycanla bağlı rus, ingilis, türk dillərində kitabları Qurultay nümayəndələrinə payladıq. Sərgi zamanı Türk Dünyasının müxtəlif ölkələrindən gələn türklərə Azərbaycanın ağrılı yeri-Qarabağ məsələsi anladıldı".
Qarabağla bağlı sərgi Qurultay iştirakçılarının diqqətinə səbəb oldu.
Qeyd edək ki, Qurultayda Azərbaycandan millət vəkili Sabir Rüstəmxanlı, Borçalı Cəmiyyətinin sədri Zəlimxan Məmmədli, “Yenicag.az” İnternet Qəzetinin baş redaktoru və Avrasiya Qəzetçilər Dərnəyi Qafqaz təmsilçisi Aqil Ələsgər,125-lər Siyasi Klubunun üzvü, tanınmış telejurnalist-publisist Tamilla Qulami, Azərbaycan Türkiyə Evi Birliyinin sədr müavini Cahandar Bayoğlu, ATXƏM-in icraçı direktoru, şair İlqar İlkin, “Yeni Nəfəs” Gənclər Hərəkatı sədri Seymur Həsənli, alimlərimiz Babək Abışov və Məhəmməd Teymurlu digərləri iştirak edirlər.
