Siyasi partiyalar prezident seçkilərinə hazırlıqlara start verməsə də, məsələni diqqət mərkəzində saxlayır; vahid namizəd mümkünmü?..
2018-ci il oktyabrın 17-də Azərbaycanda prezident seçkiləri keçiriləcək. Bu, Azərbaycan Respublikası Prezidenti postuna keçirilməsi nəzərdə tutulan 8-ci rəsmi ümumilli seçki olacaq. Vikipediya məlumatında qeyd olunur ki, Yeni Azərbaycan Partiyasından İlham Əliyevin, Müsavat Partiyasindan İsa Qəmbərin, Yeni AXCP-dən Razi Nurullayevin, BAXCP-dən Qüdrət Həsənquliyevin, MDHP-dən isə Fərəc Quliyevin namizəd olacağı gözlənilir.
Bəs digər müxalifət partiyaları seçkilərə necə hazırlaşırlar? Onların namizədləri bəllidirmi?
Ümid Partiyasının sədr müavini Tamilla Qulami “Yeni Müsavat”a bildirdi ki, seçkilərlə bağlı hələ ki konkret qərarları yoxdur: “Gələn il partiyanın qurultayı keçiriləcək. Seçkilərlə bağlı qurultay öncəsi rayon təşkilatları demək olar ki, hər şənbə mərkəzi qərargahda toplanır, müzakirələr aparılır. Həmçinin 2017-2018-ci il üçün yol xəritəsi planımız da hazırlanır. 2018-ci il seçkilərinə gəlincə isə bu barədə qəti bir fikir olmasa da ola bilsin ki, partiya ya da digər qurumlarla seçkilərə qatıla bilərik. Konfranslar, regional müşavirələrimiz başa çatdıqdan sonra bununla bağlı tam qərar veriləcək”.
ADP sədrinin müavini Həsrət Rüstəmov partiya daxilində məsələ ilə əlaqədar hələ ki heç bir müzakirənin aparılmadığını dedi: “Seçkilər növbəti il olacaq, ona görə də, doğrusu, bununla bağlı müzakirə aparmamışıq. Ümumiyyətlə, bizim mövqeyimiz belədir ki, partiya mümkün qədər seçkilərdə iştirak etməlidir. Biz də imkanlarımız çərçivəsində seçkilərə qatılmağa çalışırıq. Daha çox parlament hakimiyyətində təmsil olunmağa üstünlük veririk. Ancaq bildiyiniz kimi, Azərbaycanda prezidentli respublikadır və siyasi partiya hakimiyyətə gəlmək istəyirsə, prezident hakimiyyəti uğrunda mübarizə aparmalıdır. Seçkilərlə bağlı partiyamızda prezident seçkilərinə yaxın qərar veriləcək. Buna da partiyanın daha yüksək qurumları qərar verməlidir. Hələlik isə belə bir qərar yoxdur”.
VİP sədri Əli Əliyev hesab edir ki, müxalifət bu seçkilərə təmərküzləşmiş formada qatılmalıdır: “Bizim partiyada bu məsələ müzakirə olunub və ehtimalımız belədir ki, bu ilin ikinci yarısında seçkilər olacaq. Prezident seçkiləri bizim hesablamalarımıza görə, namizəd dəyişikliyi ilə müşahidə olunacaq. Yəni YAP bu dəfə seçkilərə başqa namizədlə gedəcək. İlham Əliyevin prezident olmasını hesablamırıq. Təbii ki, bu, ehtimallardan biridir. Bizim yanaşmamız ondan ibarətdir ki, müxalifət mümkün qədər prezident seçkilərinə təmərküzləşmiş halda qatılmalıdır. Əks halda isə şanslar çox minimaldır. Hesab edirik ki, bugünkü vəziyyəti nəzərə alarsaq, müxalifət təmərküzləşməsə, növbəti hakimiyyət dönəmi də iqtidarın yürüşü ilə müşahidə olunacaq. Əgər müxalifətin daha geniş formatda seçkilərə qatılması baş tutmasa, iştirak etdiyimiz formatlarla seçki prosesinə qatılacağıq. Hazırda 3 formatda təmsil olunuruq. Bu formatların birində 9, digərində 7 partiya təmsil olunur. Üçüncüsü isə Milli Təşəbbüs Qrupu adlı qeyri-siyasi əməkdaşlıq formatıdır ki, orada da varıq. Bu formatların biri ilə seçkiyə qatılmaq variantı da alınmasa, ikitərəfli münasibətlərimiz olan təşkilatlarla seçkiyə qatılmağı düşünürük. Yəni partiya olaraq seçkilərə qatılmaqda niyyətliyik. Bu ilin birinci yarısında gözlənilən qurultayımızda da çox güman ki, ehtimal olunan prezident seçkilərinə münasibəti ifadə edən qərarlarımız olacaq”.
AĞ Partiyanın lideri Tural Abbaslı bildirib ki, hər bir partiya üçün istənilən seçki özünü təqdim və əlavə siyasi dividentlər qazanmaq üçün bir şansdır: “Əgər nəzərə alsaq ki, bu seçki prezident seçkiləridir və Azərbaycan da prezident üsul-idarəsi ilə idarə olunur, o zaman bu seçkilərin vacibliyi daha bariz şəkildə görünür. Bizim də AG Partiya olaraq bu seçki ilə bağlı təbii ki, planlarımız və fikirlərimiz var. Ancaq nəzərə alsaq ki, prezident konstitusiya dəyişikliyindən sonra orada nəzərdə tutulan səlahiyyətlərdən istifadə edib 1-ci vitse prezident təyin edirsə, belə düşünmək olar ki, hakimiyyət 2018-ci ildə bu seçkiləri keçirməyəcək. Ola bilər ki, hakimiyyət iddia etsin ki, prezidentin səlahiyyət müddəti yeni konstitusiyaya görə, müddəti 7 ildir. Ancaq belə olmayacaq və 2018-ci ildə seçkilər keçiriləcəksə, indiki siyasi durumu nəzərə alaraq deyə bilərəm ki, bizim partiya olaraq öz namizədimiz olacaq. Təbii ki, əgər həmin siyasi vəziyyətdə hansısa müxalifət lideri digərlərindən qabaqda olacaqsa, seçkinin hansısa mərhələsində demokratiya və müsbət dəyişiklik naminə ona da dəstək verə bilərik. Məncə, hələ bu məsələlər barədə danışmaq və konkret bir söz demək üçün bir az tezdir. Prosseslərin hələ bir az da inkişaf etməsi lazımdır”.
Vətəndaş Həmrəyliyi Partiyasının Mərkəzi İcra Aparatının sədri Samir Əsədli də bildirib ki, seçkilərlə bağlı partiya daxilində müzakirələr aparılır: “Bütün hallarda siyasi partiyaların əsas fəaliyyətlərindən, müzakirə mövzularından biri də seçkilərdir. Təbii ki, prezident, parlament, bələdiyyə və digər seçkilərlə bağlı müzakirələr gedir. Eyni zamanda ölkənin taleyi, gələcəyi, demokratik seçkilərlə bağlı da fikir mübadilələri aparılır. Bunlardan biri də qeyd olunan prezident seçkiləridir. Lakin partiya seçkilərə öz namizədi ilə və ya digər bir formada qatılacaq, onu indidən söyləmək çətindir. Təbii ki, bu barədə də müzakirələrimiz gedir. Ancaq bunu yəqin ki, seçki ərəfəsində partiyanın müvafiq qurumu müəyyənləşdirəcək”.
Əli RAİS
